आरकॉम जोडणार युरोप – आशिया

मुंबई ः वायरलेस दूरसंचार सेवा व्यवसायामुळे आकंठ कर्जात बुडालेल्या रिलायन्स कम्युनिकेशन्सने या व्यवसायाला नुकतीच सोडचिठ्ठी दिली. आता ही कंपनी युरोप व आशिया हे दोन खंड ६८ हजार किलोमीटरच्या केबलने जोडणार आहे. ६० अब्ज डॉलर खर्चून टाकली जाणारी ही केबल समुद्रातून जाणार आहे.

या केबलमुळे भारत हा माहितीच्या आदानप्रदानासाठी पश्चिमेला इटलीशी तर पूर्वेला हाँगकाँगशी जोडला जाणार आहे. या व्यवहारातून कंपनीला ७० अब्ज डॉलरचा महसूल मिळण्याची अपेक्षा आहे. या केबलच्या साह्याने संदेशाचे दळणवळण २०२०च्या तिसऱ्या तिमाहीपर्यंत सुरू होईल. यातून दरवर्षी एक अब्ज डॉलरचा महसूल अपेक्षित आहे.
ही केबल चाकण्यासाठी लागणारा पैसा काही भागीदारांकडून उभा केला जाईल. या भागीदारांची संख्या तीसपर्यंत जाऊ शकेल, असेही कंपनीने सांगितले आहे.