लॉकडाऊनमध्येही खतांची विक्रमी विक्री

नवी दिल्ली : लॉकडाऊनमुळे अर्थव्यवस्था ठप्प झालेली असली तरी देशात खतांची विक्रमी विक्री झाली आहे. एप्रिल २०१९ च्या तुलनेत एप्रिल २०२० मध्ये ही विक्री ४५.०१ टक्क्यांनी जास्त झाली आहे. एप्रिल महिन्यातील पहिल्या २२ दिवसात विक्री केंद्रांवरील खतांची विक्री ही १०.६३ लाख मेट्रीक टन एवढी राहिली, जी गेल्या वर्षी याच काळात ८.०२ लाख मेट्रीक टन एवढी होती. तर व्यापाऱ्यांनी या काळात १५.७७ लाख मेट्रीक टन खतांची खरेदी केली, जी गेल्या वर्षी याच काळातील खरेदीच्या ४६ टक्के (१०.७९ लाख मेट्रीक टन) जास्त आहे. खत आणि रसायन मंत्रालयाने याबाबतची माहिती दिली.

गुंतवणूकदारांचा थरकाप; पाच लाख कोटी गमावले

आगामी खरीप हंगाम पाहता खतांची विक्री अत्यंत सुलभरित्या होईल याची काळजी सरकारकडून घेण्यात आली होती. देशात खतांचा कोणताही तुटवडा नसून राज्यांनी पुरेसा साठा करुन ठेवला आहे, अशी माहिती खत आणि रसायन मंत्री सदानंद गौडा यांनी दिली. पेरणीच्या अगोदर शेतकऱ्यांसाठी खताचा पुरेसा साठा उपलब्ध होईल, असं आश्वासनही गौडा यांनी दिलं. सरकारने खतांचा जीवनावश्यक वस्तू कायद्यात समावेश केला होता. यामुळे खत निर्मिती चालू राहिली. लॉकडाऊनचा शेतीवर परिणाम होऊ नये म्हणून हा निर्णय घेण्यात आला होता.

लॉकडाऊन ३ : आजपासून तुम्ही काय-काय करू शकता?

दरम्यान, यावर्षीच्या मान्सून अंदाजाने शेतकऱ्यांच्या अपेक्षा उंचावल्या आहेत. शेतीचं काम हे साधारणपणे चालू असून या क्षेत्राची वार्षिक वाढ ३ टक्के राहिल, असा अंदाज गेल्या आठवड्यात कृषी मंत्री नरेंद्र सिंह तोमर यांनी वर्तवला होता. एकूण जीडीपीमध्ये शेती क्षेत्राचा वाटा ०.५ टक्के राहिल, असंही ते म्हणाले होते.