मुंबई : रिलायन्स जिओ इन्फोकॉम लिमिटेडने (जिओ) भारतीय बाजारपेठेत स्क्रीन्झशी भागीदारी केली आहे. जगभरातील आघाडीच्या प्रसारकांकडून मनोरंजनाधारित परस्पर संपर्कासाठी "स्क्रीन्झ'चा उपयोग करण्यात येतो.
सध्या सुरू असलेल्या जिओ क्रिकेट प्ले अलॉन्ग'ला ग्राहकांचा चांगला प्रतिसाद मिळाला असून, यामध्ये साडेसहा कोटी ग्राहकांनी सहभाग घेतला आहे. याचबरोबर "कौन बनेगा करोडपती प्ले अलॉन्ग गेम'देखील ग्राहक सातत्याने खेळत आहेत. उद्योगक्षेत्रातील तज्ज्ञांच्या मते, ड्युएल स्क्रीन अनुभव हा अभूतपूर्व बदल घडविणारा असून यामुळे टीव्ही आणि मोबाइलवरील जाहिरातींचे स्वरूप बदलेल. जिओने नावीन्यपूर्ण ब्रॅण्ड एन्गेजमेंटसाठी सुरू केलेला हा दुसरा प्लॅटफॉर्म आहे. गेल्या आठवड्यात जिओने जगातील पहिल्या कृत्रिम बुद्धिमत्तेवर आधारित ब्रॅण्ड एन्गेजमेंट प्लॅटफॉर्म जिओ इंटरऍक्‍टची घोषणा केली होती.
जिओ स्क्रीन्झ प्लॅटफॉर्ममुळे प्रसारक आणि प्रेक्षकांमध्ये टीव्ही शोमध्ये प्रश्‍न, सर्वेक्षण आणि मतांच्या माध्यमातून दुहेरी संवाद होईल. अँड्रॉइड, आयओएस आणि जिओ काय-ओएसवर एसडीके सपोर्टच्या सहाय्याने कोणत्याही डिजिटल अॅपवर हा प्लॅटफॉर्म सुरू करता येईल.