वृत्तसंस्था, नवी दिल्ली
कर्जाचा डोंगर कमी करण्यासाठी रिलायन्स इन्फ्रास्ट्रक्चरचे प्रवर्तक अनिल अंबानी यांच्यावर कंपनीचे कार्यालय भाडेपट्ट्याने देण्याची वेळ आली आहे. रिलायन्स इन्फ्रातर्फे मुंबई शेअर बाजारास सोमवारी या संबंधी माहिती देण्यात आली.
सांताक्रूझ पूर्व येथील रिलायन्स सेंटर हे कार्यालय दीर्घकालीन भाडेपट्ट्याने (लाँग टर्म लीज) देण्याचा निर्णय कंपनीने घेतला असून यातून जमा होणारी रक्कम ही पूर्णपणे थकीत कर्जाच्या परतफेडीसाठी वापरण्यात येईल, असे रिलायन्स इन्फ्रातर्फे दाखल केलेल्या माहितीत नमूद करण्यात आले आहे. या भूखंडावर रिलायन्स इन्फ्राचीच मालकी राहील व २०२०पर्यंत कर्जमुक्त होण्याचे उद्दिष्ट आमच्या कंपनीने आखले आहे, असेही यात म्हटले आहे. पश्चिम द्रुतगती मार्गालगत अतिशय मोक्याच्या ठिकाणी या कार्यालयाची इमारत असून ती चार एकरच्या भूखंडावर उभी आहे. या कार्यालयाचे एकूण क्षेत्रफळ ६.९५ लाख चौरस फूट आहे. या कार्यालयीन इमारतींपासून छत्रपती शिवाजी आंतरराष्ट्रीय विमानतळ १५ मिनिटांवर तर देशांतर्गत विमानतळ १० मिनिटांवर आहे. तसेच, वांद्रे-कुर्ला संकुल तेथून २० मिनिटांच्या अंतरावर आहे.
हे कार्यालय भाडेपट्ट्यावर देण्यात आल्यानंतर रिलायन्स इन्फ्राचे मुख्यालय दक्षिण मुंबईतील बॅलॉर्ड इस्टेट येथे स्थानांतरित करण्यात येईल. रिलायन्स समूहात झालेल्या मालमत्ता वाटपानंतर ही मालमत्ता अनिल अंबानी यांच्या वाट्यास आली असून ती सध्या रिक्त आहे.