फेक न्यूजमुळे रिझर्व्ह बँकेची डोकेदुखी वाढली

मुंबई : सोशल मीडियावर खोट्या किंवा फेक बातम्यांनी अक्षरशः थैमान घातलं आहे. या फेक न्यूजमुळे भारतीय रिझर्व्ह बॅंकेची डोकेदुखी वाढली आहे. रिझर्व्ह बॅंकेतील अधिकाऱ्यांच्या सुट्ट्या अचानक रद्द करण्यात आल्याने काहीतरी मोठा निर्णय घेण्यात येणार आहे, अशी पोस्ट सोशल मीडियावर व्हायरल झाल्याने अखेर रिझर्व्ह बॅंकेला ही पोस्ट खोटी असल्याचं स्पष्ट करावं लागलं आहे.

सोशल मीडियावर अनेक दिवसांपासून ही पोस्ट व्हायरल होत आहे. रिझर्व्ह बॅंकेने सर्व अधिकाऱ्यांच्या सुट्ट्या अचानकपणे रद्द केल्या आहेत. देशात काहीतरी मोठं घडणार आहे, असं या व्हायरल पोस्टमध्ये म्हटलं आहे. काही यूजर्सने तर याचा संबंध २ हजार रुपयांच्या नोटेशी आणि काश्मीर प्रश्नाशी लावला आहे. काश्मीरमध्ये कलम ३७० रद्द केल्यानंतर २ हजार रुपायांच्या नोटेवरही बंदी घालण्यात येणार असल्याची अफवा सोशल मीडियावरून पसरविण्यात आली आहे.


काही व्हायरल पोस्टसोबत एका वृत्तवाहिनीवरील व्हिडिओ क्लिपही शेअर करण्यात आल्यामुळे या खोट्या माहितीवर सहज विश्वास ठेवला जातोय. नेटकऱ्यांनी ही खोटी माहिती मोठ्या प्रमाणावर शेअर केली आहे. काही यूजर्सने तर ही माहिती व्हॉट्सअॅपवरही फॉरवर्ड केल्याने याबाबतची विचारणा रिझर्व्ह बँकेकडे वारंवार होऊ लागली होती. त्यामुळे रिझर्व्ह बँकेची डोकेदुखी वाढली.


मात्र, ही माहिती खोटी असल्याचे रिझर्व्ह बॅंकेने शनिवारी ट्विट करून स्पष्ट केलं. 'रिझर्व्ह बॅंकेच्या अधिकाऱ्यांच्या सुट्ट्या रद्द केल्याचं सोशल मीडियावर सांगितलं जातंय. ही माहिती पूर्णतः खोटी आहे. रिझर्व्ह बॅंकेने असा कोणताही आदेश जारी केलेला नाही.' असं या ट्विटमध्ये म्हटलंय.