ई-व्यवहारांमध्ये स्टेट बँकेला पसंती

नवी दिल्ली ः नोटाबंदी, जीएसटी लागू झाल्यानंतर देशात ऑनलाइन व्यवहारांच्या प्रमाणात मोठी वाढ झाली. असे व्यवहार भारतीय स्टेट बँकेमार्फत करण्याला ग्राहकांनी सर्वाधिक पसंती दिल्याचे स्पष्ट झाले आहे.

नुकत्याच सादर झालेल्या एका अहवालानुसार ऑनलाइन बँकिंग व्यवहारांमध्ये स्टेट बँक हा एक विश्वासार्ह बँकिंग ब्रँड म्हणून नावारूपाला आला आहे. ऑनलाइन व्यवहारांमध्ये बऱ्याचदा खासगी बँकांना पसंती दिली जात असल्याचे दिसून आले असले तरी, बड्या शहरांमधून होणाऱ्या ऑनलाइन व्यवहारांचे प्रमाण पाहता सर्वोच्च सुरक्षितता आणि विश्वासार्हता यासाठी ग्राहकांनी स्टेट बँकेला पसंती दर्शवल्याचे दिसून आले आहे. पंजाबसारख्या राज्यामध्ये मात्र, ग्राहकांचा अजूनही प्रादेशिक बँकांवरच विश्वास असल्याचे दिसून आले आहे. ‘ट्रूकॉलर’तर्फे नुकत्याच करण्यात आलेल्या एका सर्वेक्षणात ही बाब समोर आली आहे.

‘ट्रूकॉलर’ ही एक इंटिग्रेटेड कॉलर आयडी सेवा पुरवठादार असून, त्यांनी मेसेजिंग अॅपद्वारे हे सर्वेक्षण केले. त्यामध्ये जून ते सप्टेंबर या कालावधीत कोणत्या बँकेने ग्राहकांच्या वतीने सर्वाधिक ऑनलाइन व्यवहार केल्याचे दिसून आले आहे. त्यामध्ये सर्वाधिक म्हणजेच ३० टक्के ग्राहकांनी स्टेट बँकेच्या पारड्यात आपला विश्वास टाकला आहे. त्या पाठोपाठ १४ टक्के ग्राहकांनी एचडीएफसी बँकेवर विश्वास दाखवला आहे. त्यानंतर ९ टक्के ग्राहकांनी आयसीआयसीआय बँकेला पसंती दिली आहे.