एसबीआय वेबसाइटचे नवे नाव

मुंबई ः भारतीय स्टेट बँकेने (एसबीआय) आपल्या ‘sbi.co.in’ या कॉर्पोरेट वेबसाइटचे नामकरण ‘bank.sbi’ असे केले आहे. यासाठी ‘जेनेरिक टॉप लेव्हल डोमेन’ घेण्यात आले आहे. यामुळे आता बँकेला पारंपरिक ‘.com’ किंवा ‘.co.in’ हे डोमेन वापरण्याची गरज उरणार नाही. यथावकाश बँकेच्या नेहमीच्या वेबसाइटचे डोमेनही ‘.sbi’ असे होणार आहे.

टीसीएसची भाग पुनर्खरेदी

नवी दिल्ली ः टाटा कन्सल्टन्सी सर्व्हिसेसच्या (टीसीएस) संचालक मंडळाने १६ हजार कोटी रुपयांच्या भाग पुनर्खरेदीला हिरवा कंदिल दाखवला आहे. कॉर्पोरेट जगतातील ही सर्वात मोठी भाग पुनर्खरेदी ठरली आहे. यामध्ये प्रत्येक समभाग २,८५० रुपये प्रति समभाग या किमतीने घेतला जाणार आहे. पुनर्खरेदीदरम्यान ५.६१ कोटी समभाग खरेदी केले जातील.

सरसकट परवाने नाहीत

मुंबई ः पेमेंट सेवा निर्माण करण्यासाठी किंवा खासगी बँका सुरू करण्यासाठी कुणालाही, सरसकट परवाने दिले जाणार नाहीत, असे आरबीआयचे डेप्युटी गव्हर्नर आर. गांधी यांनी येथे स्पष्ट केले. पैशाचे व्यवहार अत्यंत जबाबदारीने करावे लागतात. त्यामुळे वित्तसंस्था होऊ पाहणाऱ्या प्रत्येक संस्थेची विश्वासार्हता पाहून, ही संस्था लोकांचा पैसा सांभाळण्यास लायक आहेका याची खात्री करून मगच पेमेंट सेवा सुरू करण्यासाठी परवाने दिले जातील, असेही त्यांनी सांगितले.

‘चंद्रा’पुढील आव्हानांना सुरुवात

मुंबई ः टाटा समूहाचे नवे अध्यक्ष म्हणून एन. चंद्रशेखरन उर्फ चंद्रा उद्या, मंगळवारी प्रत्यक्ष कार्यभार हाती घेत आहेत. टाटा स्टीलच्या युरोपातील कारभाराकडे त्यांना तातडीने लक्ष द्यावे लागणार आहे. टाटा मोटर्सच्या नॅनो उपक्रमाला नफ्यात आणणे व एक हजार कोटींहून अधिक होणारा तोटा थांबवणे हेदेखील मोठे आव्हान चंद्रा यांच्यापुढे असणार आहे.