वृत्तसंस्था, नवी दिल्ली
'भारत २२ ईटीएफ'च्या पहिल्या टप्प्याला मिळालेल्या मोठ्या प्रतिसादानंतर आता केंद्र सरकारने या योजनेचा दुसरा टप्पा सादर करण्याची तयारी आरंभली आहे. त्यासाठी 'आयसीआयसीआय प्रुडेंशियल म्युच्युअल फंडा'ने प्रस्ताव दाखल केला आहे.
'भारत २२ ईटीएफ'मध्ये २२ कंपन्यांना समावेश आहे. गेल्या वर्षी नोव्हेंबरमध्ये सादर केलेल्या 'भारत-२२ एक्स्चेंज ट्रेडेड फंडा'च्या पहिल्या टप्प्यामध्ये केंद्र सरकारने १४,५०० कोटी रुपयांची बेगमी केली होती. चालू आर्थिक वर्षात प्रथमच सादर करण्यात येणाऱ्या या योजनेच्या मदतीने केंद्र सरकार ८०,००० कोटी रुपयांच्या निर्गुंतवणूक मोहिमेला बळ देण्याची शक्यता आहे. या निर्देशांकामध्ये सार्वजनिक क्षेत्रातील कंपन्या, सरकारी कंपन्यांशिवाय, सरकारी बँका, एल अँड टी, अॅक्सिस बँक आणि आयटीसीसारख्या खासगी क्षेत्रातील ब्लूचिप कंपन्यांचा समावेश आहे. चालू आर्थिक वर्षामध्ये सादर करण्यात येणाऱ्या 'भारत-२२ एक्स्चेंज ट्रेडेड फंडा'मध्ये ओएनजीसी, आयओसी, स्टेट बँक, बीपीसीएल, कोल इंडिया आणि नाल्को आदी मोठ्या सरकारी कंपन्यांचा समावेश आहे. या शिवाय भारत इलेक्ट्रॉनिक्स, इंजिनीअर्स इंडिया, एनबीसीसी, एनटीपीसी, एनएचपीसी, गेल, एनएलसी इंडिया आदींचा समावेश आहे. सरकारी कंपन्यांच्या शेअरमध्ये वित्त, उद्योग, ऊर्जा, यूटीलिटीज, एफएमसीजी आणि बेसिक मटेरियल आदी सहा मूलभूत क्षेत्रातील कंपन्यांचा समावेश आहे. या शिवाय सार्वजनिक क्षेत्रातील स्टेट बँक, इंडियन बँक आणि बँक ऑफ बडोदाचा समावेश आहे.