सेन्सेक्स, निफ्टी उच्चांकी

मुंबई ः मुंबई तसेच राष्ट्रीय शेअर बाजाराच्या निर्देशांकांनी सोमवारी दिवसअखेर आतापर्यंतची सर्वोच्च पातळी गाठली. सेन्सेक्स २००.९५ अंक उसळत ३२६३३.६४ या स्तरावर तर निफ्टी ६३.४० अंक वर जात १०२३०.८५ अंकांवर बंद झाला. धनत्रयोदशीच्या पूर्वसंध्येला भांडवल बाजारात ही सकारात्मक लाट आल्यामुळे गुंतवणूकदारांमध्ये उत्साह संचारला आहे.

आगामी काळात रिअल इस्टेट, सिमेंट, पोलाद, यंत्रसामग्री तसेच एफएमसीजी ही क्षेत्रे गुंतवणुकीसाठी योग्य असतील, असे बाजारतज्ज्ञांचे मत आहे. सध्या ज्या कंपन्यांचे भाग वधारलेले आहेत, त्यामध्ये पुडील काळात सावधपणे गुंतवणूक करणे गरजेचे आहे, असे बाजारतज्ज्ञ केदार ओक यांनी सांगितले आहे. भांडवल बाजारात करेक्शन येणे अपेक्षित असल्यामुळे दीर्घकालीन गुंतवणूक करण्याचा सल्लाही तज्ज्ञांनी दिला आहे.