सेवाकर विवरणपत्र ३० एप्रिलपर्यंत

नवी दिल्ली ः सेवाकर विवरणपत्र भरण्यासाठी केंद्र सरकारने पाच दिवसांची मुदत वाढ देऊ केली आहे. आता हे विवरणपत्र ३० एप्रिलपर्यंत भरता येईल. यामुळे लाखो सेवाकरदात्यांना दिलासा मिळाला आहे.

प्रत्येक नोंदणीकृत सेवाकरदात्याला सेवाकराचे विवरणपत्र एसटी-३ या अर्जाद्वारे दर सहा महिन्यांनी, दंड टाळण्यासाठी भरावे लागते. एप्रिल ते सप्टेंबर या काळासाठी सेवाकर विवरणपत्र भरणा २५ ऑक्टोबरपर्यंत करायचा असतो तर, ऑक्टोबर ते मार्च या कालावधीसाठी ही तारीख २५ एप्रिल असते. याविषयी केंद्रीय उत्पादन शुल्क मंडळाने जारी केलेल्या आदेशात विवरणपत्र भरण्याची मुदत २५ एप्रिल रोजी वाढवून ती ३० एप्रिलपर्यंत करण्यात आल्याचे नमूद केले आहे. केंद्रीय उत्पादन शुल्क व सेवाकर यांची प्रक्रिया स्वयंचलित झाली आहे. या प्रक्रियेला सरावताना करदात्यांना अडचणी येत आहेत. त्याची दखल घेऊनच ही मुदतवाढ देण्यात आली आहे. मात्र सेवाकराचे विवरणपत्र www.aces.gov.in या संकेतस्थळावरच भरायचे आहे.