इन्फोसिसची शेअर पुनर्खरेदी

वृत्तसंस्था, बंगळुरू

देशातील दुसऱ्या क्रमांकाची सर्वात मोठी आयटी कंपनी असलेल्या इन्फोसिसने तिच्या समभागांची पुनर्खरेदी करायचा निर्णय घेतला आहे. याअंतर्गत १३ हजार कोटी रुपयांच्या समभागांची पुनर्खरेदी केली जाणार आहे.

इन्फोसिसने समभागांची पुनर्खरेदी करावी यासाठी संस्थापकांच्या गटाकडून तसेच माजी अधिकाऱ्यांकडून दबाव वाढत होता. त्याला प्रतिसाद देत कंपनीने हा निर्णय घेतला आहे. त्याचप्रमाणे लाभांशाचाही विचार असल्याचे कंपनीने सांगितले आहे. समभाग पुनर्खरेदीची संपूर्ण प्रक्रिया राबवण्यासाठी कंपनीने स्वतंत्र संचालक असेल्या रवि वेंकटेशन यांची नियुक्ती केली आहे.

इन्फोसिसच्या निव्वळ नफ्यात चालू वर्षाच्या पहिल्या तीन महिन्यांत केवळ ०.२ टक्के वाढ होऊ शकली आहे. इन्फोसिसचा एकूण निव्वळ नफा २.८ टक्क्यांनी घसरला आहे. इन्फोसिसप्रमाणेच कॉग्निझन्टने ३.४ अब्ज डॉलरचे समभाग परत खरेदी करण्याचे तर टीसीएसने १६ हजार कोटी रुपयांचे समभाग पुन्हा खरेदी करण्याचे ठरवले आहे.