स्मार्टफोन हेच कार्ड

नवी दिल्ली ः जगभरातील कंपन्या २०२०पर्यंत आपापल्या कार्यालयांत तसेच आस्थापनांमध्ये प्रवेश करण्यासाठी लागणाऱ्या कार्डांऐवजी स्मार्टफोनचा वापर करतील. अशा कंपन्यांची संख्या एकूण कंपन्यांच्या २० टक्के असेल, असे गार्टनर या संशोधन संस्थेचे म्हणणे आहे. गेल्यावर्षी पाच टक्क्यांहून कमी आस्थापनांनी स्मार्टफोनचा वापर अशा पद्धतीने केला होता.


जीएसटीचा परिणाम कमी

नवी दिल्ली ः देशात जीएसटी लागू झाल्यावर त्यामुळे जीडीपी घसरण्याची भीती नसल्याचे नोमुरा या जपानी संस्थेच्या अहवालात नमूद करण्यात आले आहे. अहवालानुसार, जीएसटीमुळे देशात महागाई वाढण्याची फारशी शक्यता नाही, तसेच आर्थिक विकासावर याचा परिणाम विशेष होणार नाही. आंतरराष्ट्रीय नाणेनिधीने देशाचा जीडीपी एक टक्क्याने खाली येईल, असे बाकित वर्तवल्यानंतर नोमुराचा हा अहवाल प्रसिद्ध झाल्यामुळे याला महत्त्व प्राप्त झाले आहे.

अपारंपरिक ऊर्जानिर्मिती

मुंबई ः टाटा पॉवरच्या अपारंपरिक ऊर्जानिर्मितीमध्ये मोठ्या प्रमाणावर वाढ झाली आहे. या प्रकारच्या स्रोतांपासून ऊर्जानिर्मितीची कंपनीची क्षमता ३ हजार ६० मेगावॉट झाली आहे. यामुळे टाटा पॉवर ही अजीवाश्म प्रकारच्या इंधनाचा वापर करणारी देशातील सर्वात मोठी कंपनी ठरली आहे.