- ५जी आयफोन बाजारात येण्याची शक्यता
वृत्तसंस्था, बेंगळुरू
मागील वर्षात स्मार्टफोनच्या विक्रीत जगभरात प्रथमच घट झाल्याचे दिसून आले आहे. सन २००८नंतर प्रथमच ही स्थिती निर्माण झाली असल्याचे गार्टनरच्या ताज्या सर्वेक्षण अहवालात म्हटले आहे. मात्र, नव्या वर्षाला एक महिना होत आला असताना या परिस्थितीत थोडी सुधारणा झाली असून १.५७ अब्ज फोनची विक्री झाली आहे.
गार्टनरच्या संशोधन विभागाचे उपाध्यक्ष अॅनेट झिमरमॅन यांनी सांगितले की, स्मार्टफोन उत्पादकासाठी २०१९ हे वर्ष आव्हानात्मक गेले. उच्च दर्जाच्या स्मार्टफोनचा पुरवठा जगभरात वाढला, त्यामुळे साहजिकच या फोनच्या किंमती घसरल्या. त्याचवेळी स्मार्टफोन बदलून देण्याची बाजारपेठ अधिकाधिक सक्षम होऊ लागल्यामुळे याचा एकत्रिम परिणाम बाजारपेठांवर दिसून आला.
या पार्श्वभूमीवर, चालू वर्ष मोबाइलसाठी चांगले जाईल, असे भाकित या अहवालात व्यक्त करण्यात आले आहे. नव्या ५जी तंत्रज्ञानाला अनुसरून तयार केल्या गेलेल्या स्मार्टफोनना सुगीचे दिवस येऊ घातले आहेत. त्यामुळे ४जी फोनच्या विक्रीपेक्षा ५जी फोनची विक्री दुप्पट होईल, असा अंदाज आहे.
२०२० जाणार सुसह्य
गार्टनरने प्रसिद्ध केलेल्या निवेदनात अॅनेट म्हणाल्या की, जगातील अनेक प्रदेशांत ५जी प्रणाली सुरू करण्यात आली आहे. या ५जी प्रणालीच्या भरवशावर रहात अनेकांनी स्मार्टफोन खरेदी करणे लांबणीवर टाकले होते. त्यांना आता मोबाइल खरेदीची इच्छा होऊ शकते. २०२०मध्ये स्मार्टफोनच्या किंमती कमी होतील, अशी आशा या ग्राहकांना आहे. चालू वर्षात ५जी स्मार्टफोनची विक्री २२.१० कोटी युनिट इतकी होईल, असा अंदाज गार्टनरने व्यक्त केला आहे. यामुळे ५जी स्मार्टफोनचा एकूण फोनविक्रीतील हिस्सा १२ टक्के होईल. हाच हिस्सा २०२१पर्यंत दुपटीने वाढेल, असेही या निवेदनात म्हटले आहे.
चीनचे निर्विवाद वर्चस्व
५जी फोनच्या मागणीत चीनचेच वर्चस्व दिसून येणार आहे. आशिया-प्रशांत पट्ट्यामध्ये ग्रेटर चीनची बाजारपेठ स्मार्टफोनसाठी झपाट्याने विस्तारत आहे. चालू वर्षातही आशिया-प्रशांत पट्ट्यात स्मार्टफोन खरेदीत चीनचा प्रथम क्रमांक असेल तर जगात तो दुसऱ्या क्रमांकाचा देश राहिल.