हमीपत्रांसाठी विशेष लेखापरीक्षण

नवी दिल्ली ः पंजाब नॅशनल बँकेत हमीपत्राच्या साह्याने नुकत्याच उघड झालेल्या १२,७०० कोटी रुपयांच्या गैरव्यवहाराच्या पार्श्वभूमीवर, रिझर्व्ह बँकेने सर्व सरकारी बँकांचे विशेष लेखा परीक्षण सुरू केले आहे. यामध्ये व्यापारविषयक पतपुरवठा तसेच दिलेली हमीपत्रे आणि त्यांच्या साह्याने केला गेलेला पतपुरवठा यांचा तपशील रिझर्व्ह बँकेने मागवला आहे.

हमीपत्रांचा तपशील तपासतानाच, अशी हमी देताना संबंधित बँकेने स्वतःजवळ पुरेशी रोकड ठेवली आहे का हेदेखील रिझर्व्ह बँक पाहणार आहे. याखेरीज केंद्रीय अर्थ मंत्रालयाने सरकारी बँकांना कामकाजातील तसेच तंत्रज्ञानविषयक वाढत्या जोखीमेशी मुकाबला करण्यासाठी कृती आराखडा येत्या पंढरवड्यात सादर करण्यास सांगितले आहे.