डेरिव्हेटिव्ह व्यवहारांसाठी विशेष कोड

अक्षय तृतीयेपासून मुंबई शेअर बाजारात अंमलबजावणी

वृत्तसंस्था, नवी दिल्ली भांडवल बाजारात गुंतवणूकदारांच्या वतीने गुंतवणूक करणाऱ्या ब्रोकर्ससाठी डेरिव्हेटिव्ह व्यवहार करताना यापुढे विशेष कोड वापरावा लागणार आहे. हा सहभाग कोड अर्थात सीपी कोड सोमवारी ९ मे रोजी, अक्षय तृतीयेपासून मुंबई शेअर बाजार (बीएसई) देणार आहे. याची अंमलबजावणीही त्या दिवसापासूनच केली जाणार आहे.

इक्विटी डेरिव्हेटिव्ह व चलन डेरिव्हेटिव्ह या दोन प्रकारच्या डेरिव्हेटिव्ह व्यवहारांसाठी ही अंमलबजावणी होईल. अशा प्रकारे विशेष सीपी कोड वापरून ट्रेडिंग करण्यात नेमक्या कोणत्या अडचणी उभ्या राहतात त्याचा मागोवा घेण्यासाठी नमुना सौदासत्र ७ मे रोजी होणार आहे. नव्या पद्धतीने डेरिव्हेटिव्हचे सौदे करताना असे सौदे क्लिअरिंग मेंबरद्वारे झाले असतील तर त्या सौद्यांसाठी ग्राहकाच्या कोडसमवेत ब्रोकर्सना हा सीपी कोड भरणे आवश्यक ठरणार आहे.