सुवार्ता ; स्टेट बँकेची कर्जे झाली स्वस्त

मुंबई : भारतीय स्टेट बँकेने 'मार्जिनल कॉस्ट ऑफ फंड-बेस्ड रेट' (एमसीएलआर) मध्ये ०.०५ टक्के कपात केली. त्यामुळे बँकेची कर्जे काही प्रमाणात स्वस्त होणार आहेत. विशेषतः गृह व वाहन कर्ज काढू इच्छिणाऱ्यांसाठी ही सुवार्ता आहे. ही दरकपात सर्वच कर्जांसाठी असून ती १० तारखेपासून लागू होणार आहे. चालू आर्थिक वर्षात बँकेने केली ही नववी दरकपात आहे.

या ०.०५ टक्के कपातीमुळे एमसीएलआर ७.९० टक्क्यांवरून ७.८५ टक्क्यांवर आला आहे. भारतीय रिझर्व्ह बँकेने पतधोरणाचा आढावा जाहीर केल्यानंतर लगेचच ही दरकपात झाली आहे. कर्जे स्वस्त करण्याबरोबरच स्टेट बँकेने ठेवींवरील व्याजदर रिटेल प्रकारात ०.१० ते ०.५० टक्के तर, घाऊक प्रकारात ०.२५ ते ०.५० टक्के कमी केले आहेत. दोन कोटी रुपयांपेक्षा कमी रकमेच्या रिटेल ठेवींसाठी तसेच दोन कोटी रुपयांपेक्षा अधिक रकमेच्या घाऊक ठेवींसाठी हे दरही १० फेब्रुवारीपासून लागू होणार आहेत.