पोलाद उद्योजकांसाठी विशेष पुरस्कार

म. टा. प्रतिनिधी, मुंबई

पोलाद (स्टील) उद्योगाला चालना देण्यासाठी तसेच या उद्योगात कार्यरत असणाऱ्यांना आणखी प्रोत्साहन देण्याच्या दृष्टीने या उद्योगातील मान्यवरांना यावर्षीपासून विशेष पुरस्काराने गौरवले जाणार आहे. ‘स्टील युजर फेडरेशन ऑफ इंडिया’च्यावतीने (सुफी) हे पुरस्कार सुरू केले जाणार आहेत. हे पुरस्कार यावर्षी १६ डिसेंबर रोजी येथे एका दिमाखदार सोहळ्यात प्रदान केले जातील.

यावर्षातील उत्कृष्ट स्टील कंपनी, यावर्षातील उदयोन्मुख स्टील कंपनी, व स्टील सीईओ अशी या पुरस्कारांची वर्गवारी आहे. विविध क्षेत्रातील मान्यवरांची समिती या तीन पुरस्कारांची निवड करणार आहे. स्टील कंपन्यांना एका मंचावर आणणे, उत्पादनक्षमता व दर्जा वाढवणे, त्याचबरोबर जागतिक स्टील उद्योगात भारताचे नाव अग्रस्थानी आणणे, हा सुफीचा मुख्य उद्देश आहे. कच्च्या स्टीलच्या निर्मितीत भारताचा सध्या जगात तिसरा क्रमांक लागतो. यावर्षी कामगिरीत आणखी सुधारणा होऊन आपण दुसऱ्या क्रमांकावर येण्याची शक्यता आहे. स्थानिक बाजारपेठेत स्टील उत्पादनासाठी आवश्यक असणारे लोह तसेच कामगारांच्या कार्यक्षमतेवर स्टील उद्योग पुढे जात आहे. देशाच्या जडणघडणीत स्टील उदयोगाचा मोठा वाटा आहे. त्यामुळे या उद्योगाला आणखी कार्यक्षम करण्याच्या दृष्टीने पुरस्कारांचे आयोजन करण्यात आले आहे, असे सुफीचे अध्यक्ष निकुंज तुराकिया यांनी सांगितले.