सोन्यावरील एक टक्का कर रद्द

वृत्तसंस्था, नवी दिल्ली

सोन्याच्या खरेदीसाठी लागू करण्यात आलेला एक टक्का ‘टॅक्स कलेक्टेड अॅट सोर्स’ अर्थात ‘टीसीएस’ रद्द करण्यात आला आहे. केंद्र सरकारने दोन लाख रुपयांपेक्षा अधिक रकमेच्या खरेदीवरील टीसीएस रद्द केला असे जाहीर केले असले तरी, याचा सर्वाधिक फायदा सोने खरेदीसाठीच होणार आहे.

दोन लाख रुपयांपर्यंतच रोखीत खरेदी करता येईल, असे सरकारने यापूर्वी जाहीर केले होते. आता दोन लाख रुपयांवरील रोखीच्या खरेदीसाठी लागू करण्यात आलेला टीसीएस रद्द करण्यात आला आहे. याचा फायदा केवळ सोनेखरेदी करण्यासाठीच होणार आहे. येत्या १ एप्रिलपासून हा कर रद्द होणार आहे. यामुळे दोन लाख रुपये व त्यावरील रकमेचे सोने (चिपा, नाणी व बिस्किटे या स्वरूपात) खरेदी करताना त्यावर अतिरिक्त कर द्यावा लागणार नाही. त्याचप्रमाणे पाच लाख रुपयांपर्यंतच्या दागिने खरेदीवरही हा कर द्यावा लागणार नाही.