दुसऱ्या दिवशीही रुपया वधारला

वृत्तसंस्था, मुंबई

अमेरिकी डॉलरच्या तुलनेत रुपयाचा भाव सलग दुसऱ्या दिवशी वधारला. रुपयात गुरुवारी ९ पैशांनी तेजी आली व दिवसअखेरीस तो ७४.१२वर स्थिरावला. रुपया बुधवारी १८ पैशांनी वधारला होता.

कच्च्या तेलाच्या किंमतीत काहीशी घसरण नोंदवली गेल्याचा रुपयाला फायदा झाला. मात्र सकाळच्या सत्रात रुपयाची ७४.५० पर्यंत घसरण झाल्याने काळजीचे वातावरण निर्माण झाले होते. दुपारच्या सत्रात मात्र रुपयाने परतीचा प्रवास केला. दोन दिवसांत रुपयाच्या मूल्यात २७ पैशांची वृद्धी झाली आहे.

इंधनदर चढेच

देशभरातील इंधनदरांत गुरुवारीही वाढ झाली. पेट्रोलच्या दरात बुधवारी वाढ झाली नव्हती. मात्र गुरुवारी पेट्रोलचे दर प्रतिलिटर ९ तर, डिझेलचे दर २९ पैशांनी वाढविण्यात आले. यामुळे मुंबईत एक लिटर पेट्रोलसाठी ८७.८२ रुपये मोजावे लागत होते. तर, डिझेलने ७८.२२चा टप्पा गाठला. नवी दिल्लीत पेट्रोल व डिझेलचे दर अनुक्रमे ८२.३६ व ७४.६२वर पोहोचले.