नवी दिल्ली : दोन हजारांची नोट चलनातून रद्द होणार नाही तसेच नोट बंद करण्याचा सरकारचा कोणताही विचार नाही, असे स्पष्टीकरण अर्थराज्यमंत्री अनुराग ठाकूर यांनी मंगळवारी दिले. दोन हजारांची नोट चलनामध्ये उपलब्ध असल्याची माहिती त्यांनी दिली.
मागील काही आठवड्यांपासून समाज माध्यमांवर दोन हजारांची नोट बंद होणार अशा प्रकारचे मेसेज व्हायरल झाले आहेत. त्यावर आज अनुराग ठाकूर यांनी लोकसभेत लेखी उत्तर दिले. ठाकूर म्हणाले की, दोन हजारांच्या नोटा बंद करण्याचा सरकारचा कोणताही विचार नाही. सध्या चलनात २०० आणि ५०० रुपयांच्या सर्वाधिक नोटा आहेत, भारतीय स्टेट बँकेने त्यांच्या स्थानिक शाखांना एटीएममध्ये फेरबदल करण्याच्या सूचना दिल्या आहेत. त्यामुळे लवकरच एटीएममध्ये या नोटा उपलब्ध होतील, असे त्यांनी सांगितले.
दोन हजारांच्या नोटांची संख्या चलनातून कमी झाल्याने ग्राहकांमध्ये नोटा बंद होतील की काय अशी भीती निर्माण झाली आहे. मात्र ही केवळ अफवा असून दोन हजाराची नोट रद्द करण्याचा सरकारचा कोणताही हेतू नाही, असे ठाकूर यांनी स्पष्ट केले.