तिकीट इकॉनॉमीचे, प्रवास बिझनेसमधून

वृत्तसंस्था, नवी दिल्ली

एअर इंडियाने आपल्या प्रवाशांसाठी एक अभिनव योजना सुरू केली आहे. डिसेंबरच्या अखेरीस सुरू झालेल्या या योजनेनुसार इकॉनॉमी श्रेणीचे तिकिट काढणाऱ्या प्रवाशांना विशेष अतिरिक्त रक्कम भरून बिझनेस श्रेणीतून प्रवास करण्याची संधी मिळणार आहे. अर्थात, यासाठी बोली लागणार असल्याने प्रवाशांचे नशीब बलवत्तर असणे गरजेचे आहे.

इकॉनॉमी तिकीट काढणाऱ्या प्रवाशांनी या योजनेत सहभागी होण्यासाठी केवळ काही प्रमाणात अतिरिक्त रक्कम भरायची आहे. ही रक्कम प्रवाशांच्या मर्जीनुसार कमी-जास्त असू शकेल. या योजनेत सहभागी झालेल्या प्रवाशांच्या तिकीटांची उतरत्या क्रमाने (ज्याची अतिरिक्त रक्कम अधिक त्याला प्राधान्य) बोली लावण्यात येईल व बिझनेस श्रेणीतील उपलब्धतेनुसार या प्रवाशांना सामावून घेतले जाईल, असे एअर इंडियाचे अध्यक्ष प्रदीपसिंग खारोला यांनी सांगितले. आखाती देश वगळता अमेरिका, युरोप, ऑस्ट्रेलिया, जपान आणि हाँगकाँग येथे जाणाऱ्या विमानांत ही सुविधा असेल. एअर इंडियाच्या सेवेत दररोज साडेचार हजार बिझनेस श्रेणीतील तर, ७२ हजार इकॉनॉमी श्रेणीतील तिकीटे उपलब्ध असतात.

नेमकी प्रक्रिया काय?

प्रवाशांचे चेक इन झाल्यानंतर ते सुरक्षा तपासणी कक्षापर्यंत पोहोचल्यानंतर बिझनेस श्रेणीतील किती आसने रिक्त आहेत, याचा संबंधित अधिकाऱ्यांना अंदाज येईल. बिझनेस श्रेणीतील रिक्त आसने या बोली योजनेत सहभागी झालेल्या प्रवाशांना प्राधान्यानुसार देण्यात येतील. त्यामुळे बोर्डिंग गेटपर्यंत पोहोचण्यापूर्वीच नशीबवान प्रवाशांचे तिकीट बिझनेस श्रेणीत रुपांतरित झाले असेल. त्यामुळे अशा प्रवाशांना सुधारित बोर्डिंग पास देण्यात येईल. ज्या प्रवाशांना बिझनेस श्रेणीचे तिकीट मिळू शकणार नाही त्यांना बोलीसाठी भरलेले अतिरिक्त पैसे परत देण्यात येतील.