‘पेटीएम’वर भरा दंडाचे चलन

नवी दिल्ली : वाहतुकीच्या नियमांचा भंग केल्यानंतर भरावी लागणारी चलनाची रक्कम पेटीएमच्या माध्यमातून देता येणार आहे. त्यासाठी पेटीएमच्या अॅपवर ‘ट्रॅफिक चलन’ हा पर्याय निवडून वाहनाचा क्रमांक टाकल्यानंतर रक्कम अदा करता येणार आहे.

‘देशभरात वाहतुकीच्या नियमांचा भंग करणाऱ्यांची संख्या मोठी आहे. नियमभंग करणाऱ्यांकडे रोख रक्कम असल्यास दंड दिला जातो. मात्र, रक्कम नसेल तर अडचणी येतात. या पार्श्वभूमीवर संबंधितांना पेटीएमद्वारे दंड भरण्याची सुविधा उपलब्ध करून देण्यात आली आहे,’ अशी माहिती पेटीएमचे वरिष्ठ उपाध्यक्ष किरण वसिरेड्डी यांनी दिली. संबंधितांना ऑनलाइन दंड भरता यावा यासाठी राज्यांच्या वाहतूक विभागांशी करार करण्यात येणार आहे, असे वसिरेड्डी म्हणाले. सध्या मुंबई, पुणे आणि विजयवाडा येथे ही सेवा देण्यात येत असून लवकरच देशभरात ती लवकरच उपलब्ध करण्यात येणार आहे.