‘ग्लोबल सिम’ कंपन्यांना दम

नवी दिल्ली ः आंतरराष्ट्रीय सिम कार्ड व कॉलिंग कार्ड देणाऱ्या कंपन्यांकडून असमाधानकारक सेवा देण्यात येत असल्याचे उघड झाले आहे. त्यामुळे दूरसंचार नियामक प्राधिकरणाने (ट्राय) यासाठी स्पष्टीकरण मागवले आहे.

यासंदर्भात गेल्या आठवड्यात ८ ते ९ कंपन्यांसमवेत ट्रायची बैठक झाली होती. या बैठकीला मॅट्रिक्स, युनिकनेक्ट, वनवर्ल्ड टेलिसर्व्हिसेस यासारख्या कंपन्या उपस्थित होत्या. या कंपन्यांकडून दर्जाहीन सेवा दिली गेल्याचा फटका परदेशी जाणाऱ्या भारतीयांना मोठ्या प्रमाणावर बसला आहे. या कंपन्यांना दोषी धरण्यापूर्वी एसएमएसच्या साह्याने एक सर्वेक्षण करण्यात आले. त्यामध्ये आंतरराष्ट्रीय सिमकार्ड परदेशात गेल्यावर काम करते असा प्रतिसाद केवळ ५० टक्के लोकांनीच दिला. ३० टक्के लोकांनी हे सिमकार्ड काम करत नसल्याचे सांगितले तर २० टक्के लोकांनी हे सिमकार्ड अधूनमधून काम करते असे सांगितले.