‘एसईझेड’मधील व्यवसायावर आयजीएसटी

नवी दिल्ली: विशेष आर्थिक क्षेत्र अर्थात एसईझेडमधून उर्वरित देशात वस्तूंची विक्री केल्यास त्यावर इंटिग्रेटेड जीएसटी (आयजीएसटी) लागू होणार आहे. ही माहिती केंद्रीय उत्पादन व सीमा शुल्क मंडळाने दिली आहे.

एसईझेड हा व्यवसायासाठी देशातील परदेशी प्रदेश मानला जातो. या विशेष आर्थिक क्षेत्रातील व्यापार, शुल्क वेगळे असतात, ज्यांचा लाभ मुख्यतः निर्यातीसाठी होतो. आतापर्यंत, विशेष आर्थिक क्षेत्रातून क्षेत्राबाहेर पुरवल्या जाणाऱ्या वस्तूंना सीमा शुल्क लागू होत असे. या वस्तू म्हणजे एसईझेडने उर्वरित देशाला केलेली निर्यात समजली जात असे. जीएसटीअंतर्गत निर्यात हा शून्य कर असलेला पुरवठा मानला गेला आहे.

यावर आयजीएसटी लागू झाल्यास आयातदारांना त्याचे रिफंड मिळेल. हे रिफंड इनपुट टॅक्स क्रेडिटच्या स्वरूपात मिळेल. हा परतावा मिळवण्यासाठी संबंधित पुरवठादाराकडे जीएसटीइन क्रमांक असणे गरजेचे आहे.