Twitter मधील टाळेबंदीवर को-फाउंडर जॅक डोर्सी यांनी सोडले मौन; म्हणाले- 'याला मी जबाबदार आहे...'

वॉशिंग्टन: ट्विटरचे नवे मालक एलॉन मास्क (Elon Musk) यांनी ट्विटरची मालकी घेतल्यानंतर ट्विटरमधील टाळेबंदी (Twitter Layoffs) प्रकरण सध्या मोठा चर्चेचा विषय झाला आहे. एलॉन मस्क यांनी आपल्या ७५०० कर्मचाऱ्यांपैकी निम्म्या कर्मचाऱ्यांना काढून टाकण्याचा निर्णय घेतला आहे. ट्विटर कर्मचाऱ्यांना कामावरून काढून टाकण्याची प्रक्रिया सुरू झाली आहे. दरम्यान, कंपनीचे संस्थापक जॅक डोर्सी यांनी या सर्व गोष्टींवरील आपले मौन तोडले आहे.

ट्विटरचे संस्थापक आणि माजी सीईओ जॅक डोर्सी (Twitter Co-Founder Jack dorsey) यांनी ट्विटर कर्मचार्‍यांची माफी मागितली आहे. डोर्सी म्हणाले, "ट्विटरवर काम करणारे लोक बलवान आहेत. परिस्थिती कितीही कठीण असली तरी ते नेहमीच मार्ग काढतात. मला जाणवले की बरेच लोक माझ्यावर नाराज आहेत. आज तुम्ही ज्या स्थितीत आहे त्यासाठी मी जबाबदारी स्वीकारतो. मी झपाट्याने माझ्या कंपनीची वाढ केली. त्याबद्दल मी माफी मागतो. ट्विटरसाठी काम केलेल्या सर्व लोकांचा मी आभारी आहे."

वाचा: ट्विटरच्या कर्मचाऱ्यांना काढून टाकणं इतकं सोपं नाही! एलन मस्क पुन्हा अडचणीत येणार..


मस्क यांनी ट्विटर ४४ अब्ज डॉलर्समध्ये विकत घेतले

अब्जाधीश उद्योगपती एलॉन मस्क यांनी ट्विटर ४४ अब्ज डॉलर्समध्ये विकत घेतले आहे. कंपनीचा ताबा घेतल्यानंतर त्यांनी माजी सीईओ पराग अग्रवाल आणि विजया गड्डे यांसारख्या उच्च पदस्थ अधिकाऱ्यांना काढून टाकले. मस्क यांनी कंपनीतील निम्म्या कर्मचाऱ्यांना कामावरून कमी करण्याचा निर्णय घेतला आहे.

हेही वाचा: Twitter ची मोठ्या प्रमाणावर टाळेबंदी; कंपनीच्या अर्ध्या कर्मचाऱ्यांच्या नोकरीवर गदा,

एलॉन मस्क यांनी म्हटले आहे की, ट्विटरचे दिवसाला ४ दशलक्ष डॉलर्सचे नुकसान होत आहे. त्यामुळे त्यांना कामावरून कमी करण्याशिवाय पर्याय नाही. कामावरून काढण्यात आलेल्या कामगारांना तीन महिन्यांचे वेतन दिले जात आहे. हे कायदेशीररित्या आवश्यक असलेल्यापेक्षा ५०% जास्त आहे.