‘डेटा’चोरी करून खंडणीही वसूल

सॅन फ्रान्सिस्को ः ‘उबर’ या खासगी टॅक्सी सेवेच्या सुमारे ५.७० कोटी ग्राहकांची व वाहनचालकांची वैयक्तिक माहिती हॅकर्सने चोरल्याचा दावा या कंपनीने केला आहे. ही बाब जवळजवळ वर्षभर दडवून ठेवल्याचेही आता उघड झाले आहे.

ही गोष्ट समजल्यावर आपल्याला मोठा धक्का बसला असल्याचे उबरचे सीईओ दारा खुस्रोवशाही यांनी म्हटले आहे. उबरच्या सुरक्षा चमूतील दोघा जणांनी या सर्व प्रकरणावर प्रतिक्रिया दिली असून त्यानुसार अशी माहितीचोरी झाल्याचे समजल्यावरही कंपनीने तिच्या ग्राहकांना याविषयी सावध केले नव्हते. उबरचा क्लाउड आधारित सर्व्हर ब्रेक करून ही चोरी करण्यात आली. या चोरीमध्ये ग्राहकांची नावे, ईमेल व मोबाइल क्रमांक तसेच सुमारे सहा लाख वाहनचालकांची नावे व परवानाविषयक माहिती हॅकर्सच्या हातात पडली. ही सर्व माहिती नष्ट करण्यासाठी आपण हॅकर्सना एक लाख डॉलरची खंडणी दिली होती, असेही उबरने कबूल केले आहे.