वापराविना विमानतळांचे रूपांतर 'एसईझेड'मध्ये!

वृत्तसंस्था, नवी दिल्ली वापराविना पडून असलेल्या विमानतळांचे रूपांतर विशेष आर्थिक क्षेत्रांमध्ये (एसईझेड) करण्याचा सरकारचा विचार आहे. या एसईझेडमध्ये विमान कंपन्या त्यांची विमाने पार्क करू शकतील, तसेच भावी ग्राहकांसाठी त्यांचे प्रदर्शनही मांडू शकतील, असे नागरी हवाई वाहतूक सचिव आर. एन. चौबे यांनी गुरुवारी येथे सांगितले. याशिवाय सरकार विमान भाडेपट्टीने देण्याचा खर्च कमी कसा करता येईल, जेणेकरून देशांतर्गत प्रवासी विमान वाहतूक क्षेत्र आणखी आकर्षक करता येईल, याविषयीही विचार करत आहे. १५ जून रोजी सरकारने प्रवासी विमान वाहतूक धोरम जाहीर केले होते. यामध्येही हवाईमार्गाने स्थानिक जोडणी आणखी प्रभावी कशी करता येईल, त्यावर भर देण्यात आला आहे.

वापराविना पडून असलेल्या काही विमानतळांचा वापर जुनी विमाने मोडीत काढण्यासाठी किंवा त्यांचे भंगारात रूपांतर करण्यासाठी करण्याचाही सरकारचा विचार आहे. देशात किमान ४०० विमानतळ तसेच धावपट्ट्या वापराविना पडून आहेत. याबाबत चौबे म्हणाले, की मला कुणीतरी देशात मोठ्या संख्येने विमानतळ असल्याचे सांगितले. त्यापैकी अनेकांचे रूपांतर एसईझेडमध्ये करणे शक्य आहे. आपण जहाजबांधणी व जहाज भंगारात रूपांतरित करणे यामध्ये चांगली कामगिरी केली आहे. तशीच कामगिरी आपल्याला विमानासाठी करता येणे शक्य आहे, याकडेही त्यांनी लक्ष वेधले.