अमेरिकेकडून जादा आयातशुल्क आकारणीस सुरुवात

वृत्तसंस्था, वॉशिंग्टन

चीनमधून आयात होणाऱ्या २०० अब्ज अमेरिकी डॉलरच्या मालावर अतिरिक्त शुल्क आकारण्याच्या निर्णयाची अमेरिकेने सोमवारपासून अंमलबजावणी सुरू केली. यास प्रत्युत्तर म्हणून चीननेही अमेरिकेच्या ६० अब्ज अमेरिकी डॉलरच्या मालावर अतिरिक्त शुल्क लागू केले आहे.

अमेरिकेने यापूर्वी ५० अब्ज चिनी मालावर अतिरिक्त शुल्क लादले आहे. यानंतर दुसऱ्य टप्प्यात २०० अब्ज अमेरिकी डॉलर किंमतीच्या चिनी मालावर अतिरिक्त शुल्क लादले जाईल, याची घोषणा अमेरिकेने गेल्या आठवड्यात केली होती व त्यासाठी २४ सप्टेंबर ही तारीखही निश्चित केली होती. त्यानुसार सोमवारपासून अमेरिकेने या निर्णयाची अंमलबजावणी केली. याबाबत अमेरिकेचे परराष्ट्रमंत्री माइक पॉम्पिओ म्हणाले की, 'विशिष्ट उद्दिष्ट डोळ्यांसमोर ठेवून आम्ही हा निर्णय घेतला असून त्यात आम्ही यशस्वी होत आहोत. चीन ही आर्थिक महासत्ता असेल तर त्यांना त्याप्रमाणेच म्हणजे पारदर्शक कारभार करावा लागेल. संबंधित कायद्याचे पालन करून व बौद्धिक संपदेची चोरी न करता त्यांना यापुढे मार्गक्रमण करावे लागेल.'

या २०० अब्ज अमेरिकी डॉलरवर अमेरिकेकडून सध्या १० टक्के व पुढील वर्षाच्या सुरुवातीपासून २५ टक्के अतिरिक्त कर आकारण्यात येणार आहे. चीनने यापूर्वी अमेरिकेच्या ५० अब्ज अमेरिकी डॉलरच्या मालावर अतिरिक्त आयातशुल्क आकारण्यास सुरुवात केली असून सोमवारपासून त्यात ६० अब्ज अमेरिकी डॉलरच्या मालात भर पडली आहे.

दडपशाहीचा आरोप

अमेरिकेचा हा निर्णय म्हणजे दडपशाहीचा नमुना आहे, असा आरोप चीनच्या शिन्हुआ या अधिकृत वृत्तसेवेने केला. मात्र व्यापारयुद्धाच्या पेचातून मार्ग काढण्यासाठी आम्ही अजूनही अमेरिकेशी चर्चा करू इच्छितो, असेही या वृत्तसेवेने स्पष्ट केले.