व्होडाफोन आयडियाला ५१ हजार कोटींचा तोटा

नवी दिल्लीः व्होडाफोन आयडियाने गुरुवारी ५० हजार ९२१ कोटी रुपये तोटा जाहीर केला. ३० सप्टेंबर रोजी संपलेल्या दुसऱ्या तिमाहीअखेर भारतीय कंपनीने जाहीर केलेला हा आतापर्यंतचा सर्वाधिक तोटा आहे. सर्वोच्च न्यायालयाने कंपनीला समायोजित महसुलाबाबत आदेश दिल्यामुळे कंपनीच्या दायित्वामध्ये वाढ झाल्याने हा तोटा नोंदवला गेल्याचा दावा कंपनीने केला आहे.

सर्वोच्च न्यायालयाने गेल्या महिन्यात मोबाइल पुरवठादार कंपन्यांना दूरसंचार विभागाने देण्यास सांगितलेली रक्कम अदा करण्यास सांगितले होते. या पार्श्वभूमीवर, सरकारने काही सवलती दिल्यासच भारतात व्यवसाय करणे शक्य आहे, असे व्होडाफोन आयडियाचे म्हणणे आहे. गेल्या आर्थिक वर्षात, सप्टेंबरअखेर व्होडाफोन आयडियाला ४,८७४ कोटी रुपये तोटा झाला होता. न्यायालयाच्या आदेशानंतर साधारण ४४ हजार १५० कोटी रुपये तोटा होईल, असे कंपनीने गृहित धरले होते. यासाठी कंपनीने २५,६८० कोटी रुपये तरतूदही केली होती.