घाऊक महागाईत किंचित घट

वृत्तसंस्था, नवी दिल्ली

घाऊक महागाईमध्ये मार्चच्या अखेरीस किरकोळ घट झाली आहे. मार्चमध्ये घाऊक महागाईचा दर २.४७ टक्के नोंदवला गेला. फेब्रुवारीमध्ये हाच दर २.४८ टक्क्यांवर पोहोचला होता. त्यामुळे मार्चमध्ये घाऊक महागाईचा दर गेल्या नऊ महिन्यांच्या नीचांकी पातळीवर गेल्याचे स्पष्ट झाले. जानेवारीमध्ये घाऊक महागाईचा दर ३.०२ टक्क्यांवर गेला होता. गेल्या वर्षी याच कालावधीत हा दर २.८४ टक्के होता.

दरमहा आधारावर काढण्यात येणारा उत्पादित वस्तूंचा घाऊक महागाईचा दर ३.०४ टक्क्यांवरून ३.०३ टक्क्यांवर घसरला. मार्चमध्ये खाद्यपदार्थांच्या वस्तूंचे दर घसरल्याने घाऊक महागाई घटल्याचे दिसून आले. या महिन्यात अंडी, चहा, चिकन, मसाले, राजमा, मसूर, बाजरी, फळे आणि भाज्यांच्या दरात घट झाल्यामुळे महागाईमध्ये घट झाली. तर, दुसरीकडे रागी, ज्वारी, मूग, गहू आणि तांदळाच्या किमतीत वाढ नोंदवण्यात आली.

इंधन महागले

मार्चमध्ये इंधन आणि ऊर्जेची महागाई ३.८१ टक्क्यांवरून ४.७० टक्क्यांवर पोहोचली. दरमहा आधारावर मार्चमध्ये अखाद्य वस्तूंमधील घाऊक महागाईचा दर गेल्या महिन्यातील उणे २.६६ टक्क्यांवरून उणे १.३९ टक्क्यांवर पोहोचला.

कांदा झाला स्वस्त

मार्च महिन्यात अंडी, मासे आणि मांसाहारी पदार्थांमधील घाऊक महागाई गेल्या महिन्यातील उणे ०.२२ टक्क्यांवरून उणे ०.८२ टक्क्यांवर पोहोचली. या शिवाय डाळीचे दरही उणे २०.५८ टक्क्यांवर राहिले. फेब्रुवारीच्या तुलनेत कांद्याच्या दरातही ४२.२२ टक्के घट झाली.