शून्य कर असलेल्या देशांशी संबंध तोडा

जगभरातील ३०० अर्थतज्ज्ञांचे आवाहन

वृत्तसंस्था, लंडन शून्य कर असलेल्या (टॅक्स हॅवन) देशांशी जगाने संबंध ठेऊ नयेत, त्यांच्याशी कोणतेही आर्थिक व्यवहार केले जाऊ नयेत, असे आवाहन जगभरातील ३०० अर्थतज्ज्ञांनी केले आहे. येथे झालेल्या भ्रष्टाचारविरोधी परिषदेत याविषयीचे एक पत्र प्रसिद्ध करण्यात आले. या परिषदेला ४० देशांचे प्रतिनिधी तसेच जागतिक बँक व जागतिक नाणेनिधी यांचेही प्रतिनिधी उपस्थित होते.

ऑक्सफॅम या आंतरराष्ट्रीय स्तरावर काम करणाऱ्या एका गटाने जगभरातील सर्व अर्थतज्ज्ञांना एकत्र आणण्याचे काम केले आहे. या सर्व अर्थतज्ज्ञांनी यासंदर्भात एक पत्र तयार केले आहे. शून्य कर असलेल्या देशांमध्ये पैसे साठवल्यास त्यामुळे श्रीमंत लोक तसेच बहुराष्ट्रीय कंपन्या यांनाच केवळ फायदा मिळत आहे. त्यामुळे जगात विषमता वाढीस लागत असल्याचे या पत्रात विशेषत्वाने नमूद करण्यात आले आहे.

शून्य कर असलेल्या देशांमध्ये पैसे साठवल्यामुळे गरीब राष्ट्रांना याचा फार मोठा फटका बसतो आहे. यातून बाहेर पडण्यासाठी या देशांनी स्वतःभोवतीचे गूढ वलय तोडून सर्व माहिती खुली करावी, असे आवाहनही या पत्रात करण्यात आले आहे.