एकाच दिवशी सात क्रेडिट कार्डे बाजारात

तपपूर्तीनिमित्त येस बँकेची रिटेल बँकिंगमध्ये झेप

म. टा. खास प्रतिनिधी, मुंबई
खासगी क्षेत्रातील पाचव्या क्रमांकाची सर्वात मोठी बँक असलेल्या येस बँकेने मंगळवारी, एकाच दिवशी सात क्रेडिट कार्डांचे अनावरण केले. बँकेचे यंदा तपपूर्ती वर्ष आहे. त्यानिमित्त रिटेल बँकिंग व्यवसायात आणखी विस्तार करण्यासाठी बँकेने सात क्रेडिट कार्डे बाजारात दाखल केली. या सर्व क्रेडिट कार्डांची जुळणी एका वर्षाच्या आता झाल्याची माहिती बँकेच्या रिटेल व बिझनेस बँकिंगचे वरिष्ठ समूह अध्यक्ष प्रलय मंडल यांनी दिली. यावेळी क्रेडिट कार्ड व्यवसाय प्रमुख रजनीश प्रभु उपस्थित होते.
२०१०मध्ये देशात ८९ टक्के व्यवहार रोखीने होत असत. त्यात २०२०पर्यंत घसरण होऊन ६० टक्के व्यवहारच रोखीने होतील आणि प्लास्टिक पैशाचे, अर्थात क्रेडिट व डेबिट कार्डांचे महत्त्व वाढेल, असा विश्वास प्रलय मंडल यांनी व्यक्त केला. प्लास्टिक पैशाच्या वापरासंबंधी काही वर्षांपूर्वीपर्यंत गोंधळाचे वातावरण होते. परंतु आता छोट्या उद्योजकांकडून रोखीचे व्यवहार कमी करण्याची मागणी होते आहे. यामुळे इलेक्ट्रॉनिक पेमेंटला चालना मिळणार आहे. मात्र त्यासाठी पॉइंट ऑफ सेल्सची संख्या वाढणे गरजेचे आहे. भावी काळात खासगी बँका क्रेडिट कार्ड व्यवसायात पुडे जातील, असा विश्वासही मंडल यांनी व्यक्त केला. रजनीश प्रभु यांनी या सर्व कार्डांविषयी माहिती दिली. या कार्डांच्या वापरासाठी मास्टर कार्डने प्रणाली देऊ केली आहे.