येस बँक व्यवहार उद्यापासून सुरळीत

वृत्तसंस्था, नवी दिल्ली: येस बँकेचे ग्राहक उद्या, बुधवारपासून सर्व बँकिंग व्यवहार करू शकतील, असे बँकेने आपल्या ट्वीटमध्ये म्हटले आहे. १८ मार्च रोजी सायंकाळी ६ वाजल्यापासून संपूर्ण बँकिंग सेवा ग्राहकांना दिली जाईल. ग्राहकांनी गुरुवारपासून बँकेच्या नेहमीच्या कालावधीत व्यवहार करावेत. बँकेच्या डिजिटल बँकिंग सेवा व मंच यांचाही ग्राहकांना वापर करता येणार आहे. निफ्टी ठरवणाऱ्या ५० कंपन्यांमधून येस बँकेचे नाव १९ मार्चपासून वगळले जाणार आहे. आर्थिक संकटात येस बँक सापडल्यामुळे अनेक बँकांनी तिच्यात गुंतवणूक केली आहे. मात्र ही गुंतवणूक केवळ बँकेला आर्थिक स्थैर्य लाभावे यासाठीच करण्यात आली आहे, असे भारतीय स्टेट बँकेचे अध्यक्ष रजनीश कुमार यांनी सांगितले आहे.

शेअर बाजार पुन्हा कोसळले

करोना विषाणूचा वाढणारा प्रादुर्भाव आणि फेडरल रिझर्व्हने व्याजदरात केलेल्या कपातीनंतर सोमवारी देशांतर्गत बाजारांत मोठ्या प्रमाणावर घसरण झाली. सत्रांतर्गत व्यवहारांच्या अखेरीस मुंबई शेअर बाजाराचा सेन्सेक्स २,७१३.४१ अंकांनी घसरून ३१,३९०.०७च्या पातळीवर स्थिरावला. राष्ट्रीय शेअर बाजाराचा निफ्टी ७५६.१० अंकांनी घसरून ९,१९९.१०च्या पातळीवर गेला.

अनिल अंबानी, चंद्रा यांना 'ईडी'चे समन्स

येस बँक घोटाळ्यात अंमलबजावणी संचालनालयाने (ईडी) अनिल अंबानी, सुभाष चंद्रा, नरेश गोयल यांना समन्स जारी केले. अनिल अंबानी यांच्या समूहाने जवळपास १२ हजार ८०८ कोटी रुपयांचे कर्ज बुडवले व त्यात परदेशी रकमेचा दुरुपयोग झाल्याचा ईडीचा संशय आहे.