फर्टिलायजरवरील कर १२ टक्क्यांवरून ५ टक्के

मटा ऑनलाइन वृत्त । नवी दिल्ली

देशात जीएसटी लागू होण्यासाठी अवघे काही तास उरलेले असताना जीएसटी परिषदेने फर्टिलायजरवरील करात मोठ्या प्रमाणावर कपात केली आहे. हा कर १२ टक्क्यावरून ५ टक्क्यांवर आणण्यात आला आहे. त्यामुळे देशभरातील शेतकऱ्यांना मोठा दिलासा मिळाला आहे.

जीएसटी लागू झाल्यानंतर फर्टिलायजरवरील कर १२ टक्के होणार होता. त्यामुळे शेतीशी निगडीत सर्व साधने महाग होणार असल्याने त्याचा फटका बसणार असल्याचं सांगत शेतकऱ्यांनी या नव्या कर प्रणालीला विरोध केला होता. उद्योग जगतानेही फर्टिलायजरवरील कर कमी करण्याची मागणी केंद्रीय अर्थमंत्रालयाकडे केली होती. त्याची दखल घेत आज झालेल्या जीएसटी परिषदेत फर्टिलायजरवरील अवाढव्य कर कमी करण्याचा निर्णय घेऊन हा कर ५ टक्क्यांवर आणला.

जीएसटी परिषदेच्या या निर्णयामुळे खत, बी-बियाणे, टॅक्टरचे सुटे पार्ट यापासून ते शेतीसाठी लागणाऱ्या अवजारे स्वस्त होणार आहेत. या निर्णयामुळे आता राज्यांमध्ये जीएसटीनुसार फर्टिलायजरवर कमीत कमी शुन्य ते ६ टक्क्यांपर्यंतचा कर आकारला जाणार आहे. जीएसटीच्या दरानुसार आता युरीयाच्या एका पोत्याचा दर ३० ते १२० रूपये प्रति पोतं असणार आहे.