आरोग्य विम्याचे नुतनीकरण करताय; हे अतिरिक्त लाभ घेण्याचा विचार करा

डॉ. श्रीराज देशपांडे, मुंबई : कोव्हिड-१९ची साथ सगळीकडे पसरलेली असताना, वाढलेला वैद्यकीय खर्च, वैद्यकीय उपचार आणि हॉस्पिटलमधील वाढलेले वास्तव्य यामुळे पुरेसे आरोग्य विमा संरक्षण असण्याचे महत्त्व अधोरेखित झाले आहे. त्यामुळे अनेकांना आपल्या आरोग्य विमा (Healh Insurance) योजनांचा पुन्हा एकदा धांडोळा घेण्याची गरज भासत आहे. आरोग्य विमा योजनेअंतर्गत पुरेसे विमा संरक्षण असल्याची आणि त्यात वाढ करण्याची आवश्यकता आहे का, याची खातरजमा ते करत आहेत.

सराफा बाजार वधारला ; सोने-चांदीची नव्या वर्षात तेजीने सुरुवात,
विमा संरक्षण कमी असेल तर तुमच्या बचतीला आर्थिक फटका बसू शकतो. त्यामुळे विद्यमान आरोग्य विमा योजनेच्या फीचर्समध्ये नसलेले अतिरिक्त संरक्षण, जे स्वतंत्रपणे जास्तीचा प्रिमियम भरून घेण्याविषयी विचार करावा. संभाव्य घटनांचा विचार करून तुम्हाला मिळणारे लाभ किंवा विम्याची रक्कम वाढविण्यासाठी तुमच्या विद्यमान पॉलिसीवर ॲड-ऑन्स किंवा रायडर्स घेण्यात येतात.

रेल्वेचे ‘डिजिटल इंडिया’; नव्या वर्षात IRCTC ची अद्ययावत वेबसाइट,आरक्षण होणार झटपट
विद्यमान आरोग्य विमा योजनेवरील महत्त्वाच्या ॲड-ऑन संरक्षणांविषयी जाणून घेऊ या.

१. गंभीरआजारासाठीचे (क्रिटिकल इलनेस) संरक्षण
- गंभीर आजार (क्रिटिकल इलनेस) योजनेमध्ये तुम्हाला कर्करोग, मूत्रपिंड निकामी होणे, हृदयविकाराचा झटका, स्ट्रोक इत्यादी गंभीर आजारांबाबत संरक्षण प्राप्त होते. क्रिटिकल इलनेस प्लॅन असल्यास तुम्हाला गंभीर आजार असल्याचे निदान झाले तर या पॉलिसीअंतर्गत एकरकमी रक्कम मिळण्यास तुम्ही पात्र असता. गंभीर आजारामुळे उत्पन्नाच्या होणाऱ्या नुकसानाची भरपाई होण्यास या प्लॅनची मदत होते.

२. हॉस्पिटल कॅश
- हॉस्पिटलमध्ये दाखल असताना वैद्यकीय खर्चांव्यतिरिक्त होणारे खर्च आणि आपल्याला खिशातून कराव्या लागणाऱ्या खर्चाची तजवीज या योजनेमुळे होते. तुमच्या नियमित आरोग्य विमा पॉलिसीतून तुमचा वैद्यकीय खर्च भागवला जातो, पण त्या पॉलिसीमध्ये अनेक प्रासंगिक खर्चांचा समावेश नसतो. अशा प्रकारच्या प्रासंगिक खर्चांसाठी आणि तुमच्या खिशातून खर्च करावा लागू नये यासाठी हॉस्पिटलायझेशनच्या प्रत्येक दिवसासाठी एक निश्चित रक्कम देण्यात येते. ही रक्कम प्रतिदिन रु.५०० ते रु.३००० इतकी असते. त्याचप्रमाणे आयसीयूमध्ये दाखल असल्यास ही रक्कम दुप्पट असते.

३. सुपर टॉप-अप प्लॅन
- जेव्हा वैद्यकीय खर्च आवाक्याबाहेर जातो तेव्हा सुपर टॉप-अप प्लॅन तुमच्या विद्यमान आरोग्य विमा योजनेसाठी पूरक ठरतो. या योजनेअंतर्गत तुम्ही तुमच्या वजावट मर्यादेपेक्षा अधिक रकमेचे विमा संरक्षण घेऊ शकता. तुमची विद्यमान विमा योजना रु.५ लाखांची असेल आणि तुम्ही रु.७ लाखांचा टॉप-अप प्लॅन घेतला तर तुमची विद्यमान विमा रक्कम संपल्यावर तुम्ही टॉप-अप प्लॅनचा वापर करू शकता. म्हणजे तुम्ही रु.६ लाखांच्या दाव्याची नोंदणी केली तर तुमच्या विद्यमान रु.५ लाखाची रक्कम वापरली जाईल आणि त्यानंतर तुमच्या टॉप प्लॅनमधून रु.१ लाख रुपये वापरले जातील.

४. व्हेक्टर इन्श्युरन्स
- भारतात उष्णकटिबंधीय आणि उप-उष्णकटिबंधीय (उष्ण व आर्द्रतायुक्त उन्हाळा व सौम्य हिवाळा) तापमान असल्यामुळे मलेरिया, डेंग्यू, चिकनगुनिया यासारख्या व्हेक्टरजन्य आजारांचे प्रमाण वाढत असते. हे आजार डासांवाटे फैलावतात आणि दर वर्षी अनेक भारतीयांना या आजारांची लागण होते आणि त्यासाठी हॉस्पिटलमध्ये दाखल होण्याची आवश्यकता असते. या व्हेक्टर्समुळे गंभीर आजार झाला आणि त्यावरील उपचारांसाठी हॉस्पिटलमध्ये दाखल व्हावे लागले तर विमाधारकाला एकरकमी रक्कम मिळत असल्यामुळे व्हेक्टर इन्श्युरन्स विकत घेण्याचा विचार करावा.
तुमची आवश्यकता, उत्पन्न आणि वय विचारात घ्या आणि रायडर्सचा पर्याय निवडा. यामुळे तुम्हाला आवश्यक असलेले अतिरिक्त संरक्षण मिळेल.

- लेखक फ्युचर जनराली इंडिया इन्श्युरन्समध्ये चीफऑपरेटिंग ऑफिसर आहेत. ही त्यांची वैयक्तिक मते आहेत.