थकबाकीदार सभासदाच्या रकमेवर व्याज शक्य

आमची टिटवाळा येथे १९९७मध्ये नोंदणीकृत झालेली सोसायटी आहे. यात चार मालमत्ता असून १४० सदनिका व १८ दुकाने आहेत. जुन्या कमिटीचा कार्यकाळ मार्च २०१५मध्ये पूर्ण झाला. २०१३ ते २०१५ची एकत्रित सभा सप्टेंबर २०१५मध्ये झाली. जुन्या कमिटीने काम पुढे चालवण्यास असमर्थता दर्शविली. इच्छुक सभासदांनी कमिटी स्थापून सोसायटी ताब्यात घेतली. नंतर कमिटीच्या लक्षात आले, की जुन्या कमिटीने काही मालमत्तांचा गेल्या एक ते तीन वर्षांपर्यंतचा एकूण ८ लाख ५० हजार मालमत्ता कर भरणे बाकी ठेवले आहे. सोसायटीचे कन्व्हेयन्स डीड झालेले नाही. उपविधी ऑगस्ट २०१६मध्ये मंजूर केले. नवीन कमिटी डिसेंबर २०१६मध्ये बिनविरोध निवडून आली. थकीत मालमत्ता कर भरण्यासाठी विशेष सर्वसाधारण सभेत चर्चेद्वारे बहुमताने प्रत्येक सदस्याने ७ हजार रुपये रक्कम भरण्याविषयी मंजुरी मिळाली. सदस्यांचे सहकार्य व खर्चावर नियंत्रण केल्यामुळे थकीत मालमत्ता कर ९ लाख २१ हजार रु. दंड/व्याजासह भरले. परंतु काही विघ्नसंतोषी सदस्य ही ७ हजारची जादा रक्कम वारंवार सूचना/स्मरणपत्रे देऊनही भरत नाहीत. उपविधीप्रमाणे या सदस्यांवर थकीत रकमेवर २१ टक्के व्याज लावता येईल का? कारण महानगरपालिका २४ टक्के दंडव्याज आकारते.

- श्रीमती पाटील, टिटवाळा

उत्तर

तुम्ही विचारलेल्या प्रश्नावरून असे दिसते, की जुन्या कमिटीने महापालिकेला मालमत्ता कर भरलेला नाही आणि त्यामुळे ही रक्कम थकीत झालेली आहे. या परिस्थितीतून मार्ग काढण्यासाठी नव्या कमिटीने प्रत्येक सभासदाकडून प्रत्येकी ७ हजार रुपयांची रक्कम वसूल करण्याचे ठरवले. हा ठराव रीतसर सूचना देऊन बोलाविण्यात आलेल्या सर्वसाधारण सभेत संमत करण्यात आला. सर्वसाधारण सभेने मंजूर केलेला ठराव सभासद त्या सभेस उपस्थित नसला तरी त्यास बंधनकारक असतो व त्या ठरावाची पूर्तता करणे हे त्यांचे कर्तव्य ठरते. जे रक्कम देण्यास नकार करत आहेत, ते सभासद कायदा व उपविधी यांचे उल्लंघन करत आहेत. नमूना उपविधी(मॉडेल बाय लॉज)नुसार सोसायटी अशा सभासदांना थकीत रकमेवर २१ टक्क्यांनी साधे व्याज आकारू शकते. थकबादार सभासदांकडून व्याज वसूल करणे हे नक्कीच सोसायटीच्या अधिकारात बसते.