‘मेजर रिपेअर्स’ फंडातून व्हावी दुरुस्ती

माझी आई शारदाबाई लेले हीने १९७४ रोजी क्रांती सोसायटीमध्ये प्लॉट घेतला व तळमजला बांधला. परत १९८२मध्ये तिने सोसायटीच्या संमतीने वरचा मजलाही बांधला. १९८७ ला मृत्युपत्राप्रमाणे तळमजला शोभना लेले व पहिला मजला शरद लेले यांच्या नावे केला. त्याप्रमाणे सोसायटीला नामनिर्देशन पत्रही दिले. २००८मध्ये शोभना लेले यांचे निधन झाल्यावर त्यांच्या मुलाने सोसायटीच्या संमतीने व गैरप्रकारे प्रॉपर्टी कार्डवर आपले नाव लावून घेतले. तरी मला म्हणजे शरद लेले यांस प्रॉपर्टी कार्डवर नाव लावण्याकरता काय करावे लागेल?

- शरद लेले

उत्तर

तुम्ही वर्णन केलेल्या परिस्थितीनुसार, तुमच्या आईने मृत्यूपत्र केले असून त्यात पहिला मजला तुम्हाला वारशाने दिलेला आहे. आता तुम्हाला तुमच्या सोसायटीला तो मजला तुमच्या नावावर करायला विनंती करावी लागेल, जेणेकरून त्या मजल्यासाठी तुम्ही प्रॉपर्टी कार्डवर तुमचे नाव लावू शकाल. असा बदल करणे फारसे अवघड नाही. असे करण्यासाठी काही व्यक्ती उपलब्ध असतात. तसेच काही वकीलदेखील हे काम करतात. त्यामुळे प्रॉपर्टी कार्डवर तुमचे नाव घालण्यासाठी तुम्ही चांगल्या कायदेतज्ज्ञाचा सल्ला घ्यावा.

प्रश्न

मी बोरिवली पश्चिम येथील ओमविलास वैभव सोसायटीचा सभासद आहे. ही सोसायटी सुमारे २४ वर्षे जुनी आहे. आम्हाला लिकेजची समस्या सतावत आहे. सोसायटीने इमारतीच्या भिंतीच्या बाहेरील बाजूची दुरुस्ती करण्याचे मोठे काम काढायचे ठरवले आहे. आमच्या सोसायटीच्या दोन विंग्ज असून एकूण ३५ सदनिका आहेत. यामध्ये १आरके, १बीएचके व २बीएचके अशा आकाराची घरे आहेत. माझा प्रश्न असा की, ही इमारतीची बाहेरील भिंत असेल तर तिच्या दुरुस्तीसाठी सर्व सभासदांनी समान रक्कम दिली पाहिजे, की प्रत्येकाने त्याच्या सदनिकेच्या चटईक्षेत्रानुसार रक्कम द्यायला हवी?

- यतिन धोत्रे

उत्तर

तुमच्या सोसायटीत वन रूम किचन ते टू बेडरूम फ्लॅट्स अशा वेगवेगळ्या आकारांची घरे आहेत. त्यामुळे सर्वांकडून एकसमान रक्कम घेणे योग्य होणार नाही. खरे म्हणजे, मोठी दुरुस्ती ही संबंधित सोसायटीने तिच्याकडे असलेल्या मेजर रिपेअर्स फंडातून करायची असते. तसे नुमना उपविधींमध्ये (मॉडेल बायलॉज) सांगितले आहे. या फंडासाठी रक्कम देताना ती प्रत्येक सदनिकेच्या चटईक्षेत्रानुसार आणि त्यासाठी सर्वसाधारण सभेत मंजूर झालेल्या दरानुसार देणे अपेक्षित आहे. तुम्ही वर्णन केल्यानुसार तुमच्या सोसायटीच्या मेजर रिपेअर्स फंडात पुरेशी रक्कम दिसत नाही. त्यामुळेच प्रत्येक सभासदाकडून पैसे घेण्याची वेळ सोसायटीवर आली आहे. अशावेळी नमुना उपविधींमध्ये दिलेला फॉर्म्युला अनुसरावा. समजा सोसायटीने एखादा अन्य पर्याय सहमत केल्यास तो बेकायदा असेलच असे नाही. अर्थात असा कोणताही तोडगा सर्व सभासदांना न्याय देणारा असावा.

‘हाऊसिंग सोसायटी’ सदरासाठी प्रश्न

‘हाऊसिंग सोसायटी’ सदरासाठी प्रश्न पाठविताना आपल्या सहकारी गृहनिर्माण संस्थेतील इमारतींची संख्या, मजले, सदनिकांची संख्या, सदनिकांचे चटईक्षेत्र, प्रश्नाचे नेमके स्वरूप इत्यादी आवश्यक तो तपशील न चुकता नमूद करावा. मजकूर शक्य तो टाइप केलेला, अन्यथा किमान सुवाच्य हस्ताक्षरांत असावा. पाकिटावर ‘हाऊसिंग सोसायटी सदरासाठी’ असे स्पष्ट लिहावे. प्रश्न पोस्टाने किंवा कुरियरने पुढील पत्त्यावर पाठवावेतः महाराष्ट्र टाइम्स, टाइम्स टॉवर, ४ था मजला, कमला मिल्स कम्पाउन्ड, लोअर परळ, मुंबई- ४०० ०१३. आपण आपले प्रश्न mtaskquestions@gmail.com या ईमेलवरही पाठवू शकता.