लिक्विड फंडांचा वापर करताना..

बँकांच्या बचत खात्यांवरील व्याजदर अर्धा टक्का कमी झाल्यामुळे अनेक वित्त नियोजक गुंतवणूकदारांना लिक्विड फंड, अल्ट्रा शॉर्ट टर्म फंड यांतून गुंतवणूक करून चांगले उत्पन्न मिळवण्याचा सल्ला देत आहेत. त्याविषयी...

लिक्विड फंड म्हणजे काय? त्यांचा वापर केव्हा करावा?

तुमचा पैसा भांडवल बाजारात अगदी छोट्या काळासाठी गुंतवणारे फंड म्हणजे लिक्विड फंड होय. हे फंड गुंतवणूकदारांचा पैसा ट्रेझरी बिल्स, सरकारी रोखे व कॉल मनी येथे गुंतवतात. हे फंड हा पैसा ९१ दिवसांच्या मुदतपूर्तीसाठी गुंतवू शकतात. त्यामुळे एक दिवसापासून तीन महिन्यांपर्यंत मुदतीसाठी गुंतवणूकदार या फंडांतून पैसा गुंतवतात. उदाहरणार्थ, तुम्हाला तुमच्या अपत्याच्या शाळेची फी भरायची आहे, पुढच्या दोन महिन्यानंतर सुट्टीचे नियोजन करायचे आहे, अशासाठी तुम्ही लिक्विड फंडात तेवढ्या कालावधीसाठी पैसा गुंतवू शकता. तुम्हाला बोनस, मालमत्ता विक्रीतून मिळालेली रक्कम यासारखी मोठ्या प्रमाणात एकदम रक्कम मिळाल्यास ही रक्कम लिक्विड फंडात गुंतवली जाऊ शकते. इक्विटीमध्ये पैसा गुंतवणारेही लिक्विड फंडाचा वापर गुंतवणुकीसाठी करून त्यांची गुंतवणूक पसरवून ठेवणे पसंत करतात.

कशा प्रकारच्या उत्पन्नाची अपेक्षा केली जाऊ शकते?

या फंडातून गुंतवणूकदाराला पैसे हवे असतील, तर ते एका दिवसात त्याच्या बँक खात्यात जमा होतात. लिक्विड फंडासाठी एन्ट्री किंवा एग्झिट लोड नसते. लिक्विड फंडांनी गेल्या वर्षभरात सरासरी ६.५६ टक्के दराने उत्पन्न दिले आहे. बँकांच्या बचत खात्यातून मिळणाऱ्या ३.५ टक्के उत्पन्नापेक्षा हे निश्चितच अधिक आहे.

पैसा गुंतवण्यात धोका आहे का?

लिक्विड फंड हा कमी जोखमीचे व कमी चढउतार असलेले मानले जातात. याचे कारण पतगुणांकन चांगले असलेल्या आर्थिक साधनांमध्येच हे फंड पैसा गुंतवतात. गुंतवलेल्या रकमेवर मिळणाऱ्या व्याजाच्या दरात बदल झाल्यास या फंडांच्या निव्वळ मत्तामूल्यात (एनएव्ही) बदल झालेला पहायला मिळतो.

लिक्विड फंड डेट फंडांपेक्षा कसे वेगळे आहेत?

एनएव्हीच्या बाबतीत अन्य डेट फंडांपेक्षा लिक्विड फंड वेगळे ठरतात. या फंडांसाठी दुपारी दोन वाजेपर्यंत गुंतवणूक केल्यास आधीच्या दिवसाच्या एनएव्हीप्रमाणे युनिट दिले जातात. त्यामुळे लिक्विड फंडात आदल्या दिवशीची एनएव्ही मिळते. त्याचवेळी पैसे काढून घ्यायचे झाल्यास किंवा युनिट विकायचे झाल्यास ते दुपारी तीन वाजेपर्यंत विकल्यास त्याच दिवसाची एनएव्ही लागू होते.