पोलिसांसाठी १ लाख घरं

कायदा व सुव्यवस्था आणि नागरिकांच्या संरक्षणाची जबाबदारी सांभाळणाऱ्या पोलिसांवर कामाचा प्रचंड ताण असतो, हे सर्वांनाच ठाऊक आहे. पण त्यांना जुन्या, मोडकळीस आलेल्या, आधुनिक सुविधा नसलेल्या घरांमध्येही राहावं लागतं. हीच बाब लक्षात घेऊन आता राज्य सरकार पोलिसांसाठी १ लाख घरं बांधणार आहे. मुख्यमंत्री देवेंद्र फडणवीस यांनीच तशी घोषणा केली आहे.

नागपूरमधल्या लकडागंज भागात स्मार्ट पोलिस स्टेशनचं भूमिपूजन केल्यानंतर मुख्यमंत्री फडणवीस बोलत होते.

राज्य सरकारचं १ लाख घरांचं उद्दिष्ट्य आहे. यातल्या काही घरांचे मालकी हक्कही पोलिसांना देण्यात येतील. अनेक पोलिस हे वाईट अवस्थेतल्या इमारतींमध्ये राहतात. त्यातल्या काही इमारती तर दीड-दोनशे वर्षं जुन्या आहेत. गेल्या ३०-४० वर्षांमध्ये पोलिसांच्या दैनंदिन जीवनामध्ये सुधारणा व्हायला हव्या होत्या, पण घरांच्या बाबतीत तरी त्या झालेल्या नाहीत. आजही ते दाटीवाटीच्या घरांमध्ये राहत आहेत, सार्वजनिक शौचालयांचा वापर करत आहेत. त्यामुळेच त्यांच्यासाठी घरं बांधण्याची आवश्यकता आहे, असं मुख्यमंत्री फडणवीस यांनी स्पष्ट केलं.

गेल्या तीन वर्षांत आम्ही तीन हजार घरं बांधली आहेत. तर सात हजार घरांचं बांधकाम पूर्ण होण्याच्या टप्प्यावर आलेलं आहे. उर्वरित ४७ हजार घरांसाठी निविदा प्रक्रिया सुरू करण्यात आलेली आहे, अशी माहितीही मुख्यमंत्र्यांनी दिली.