नवउद्योजकांना घडवणारी हॅचरी

बेनेट युनिव्हर्सिटीमध्ये स्टार्टअपसाठी विशेष विभाग

टाइम्स न्यूज नेटवर्क

ग्रेटर नोएडा : येथील बेनेट युनिव्हर्सिटीमध्ये (बीयू) हॅचरी हा विशेष विभाग आहे. या ठिकाणी लेक्चर्स संपल्यानंतर दररोज दुपारी नवउद्योजकांना घडविण्याचे विशेष उपक्रम राबवले जातात. त्यामध्ये मार्गदर्शन सत्र, बुद्धीला चालना देणारी सत्रे आदींचा समावेश आहे. या विभागामध्ये प्रत्येक भिंतीवर ‘केवळ सकारात्मक आवाज’ यासारखे प्रेरणादायी संदेश चितारण्यात आले आहेत. एकूणच बेनेट युनिव्हर्सिटीमध्ये प्रवेश घेतलेल्या विद्यार्थ्यांना स्टार्टअप संदर्भात सखोल मार्गदर्शन करतानाच या नवउद्योजकांना घडवले जाणार आहे.

हैदराबाद येथून आलेला संकर्ष चंदा (१९) हा बेनेट युनिव्हर्सिटीचा बीटेक विद्यार्थी येत्या ३१ डिसेंबर रोजी ‘सावर्त’ हे स्वत:चे स्टार्टअप सुरू करणार आहे. त्यासाठी त्याने स्वत: ३७ लाख रुपयांचा निधी जमा केला आहे. गुंतवणूक नियोजनासाठी मार्गदर्शन करणारे व्यासपीठ म्हणून सावर्त काम करणार आहे. ‘सध्या आमची २७ जणांची टीम आहे. हॅचरीमध्ये मिळालेल्या अनमोल मार्गदर्शनाच्या जोरावर आम्ही ठरलेल्या वेळेत स्टार्टअप सुरू करण्यासाठी सज्ज आहोत. शहरी बाजारपेठेत आमचे उत्पादन दाखल केल्यानंतर दोन महिन्यांनी आम्ही ग्रामीण भागावर लक्ष केंद्रीत करणार आहोत’, असे संकर्षने सांगितले. बेनेट युनिव्हर्सिटीमध्ये संकर्षला ‘बीयू’चाच विद्यार्थी असलेला तुनाप पॉल हा तांत्रिक सल्लागार व गुंतवणूकदाराच्या रुपात भेटला.

‘आमच्याकडे अनेक विद्यार्थी भन्नाट कल्पना घेऊन येतात. तर अनेकजण उद्योगांच्या शोधात येतात. हॅचरी सर्वांसाठी खुली आहे आणि विद्यार्थ्यांच्या कल्पनांना मूर्त रूप देण्यासाठी त्यांना बळ देण्याचे काम आम्ही करतो’, असे बेनेट युनिव्हर्सिटीच्या सेंटर फॉर इनोव्हेशन अँड आंत्रप्रुनरशिपचे संचालक अजय बात्रा यांनी सांगितले. ‘बीयू’च्या हॅचरीमधील विद्यार्थ्यांच्या स्टार्टअप या गुंतवणूकदारांकडून १० टक्के समभागाच्या मोबदल्यात १० लाख रुपयांपर्यंत बीज भांडवल उभारू शकतात, असेही बात्रा म्हणाले. हॅचरीविषयी अधिक माहिती देताना ते म्हणाले की, बीयूच्या हॅचरीला केवळ एक वर्ष झाले आहे. उद्योजकतेचे धडे घेण्यासाठी प्रत्यक्ष अनुभव आवश्यक असल्याने बीयूने हॅचरी हे स्टार्टअप इनक्युबेटर सुरू केले आहे. त्यासाठी हॅचरीमध्ये आम्ही विविध लोकांना चर्चा तसेच परिषदांसाठी आमंत्रित करतो. विद्यार्थी त्यांच्याशी सल्लामसलत देखील करू शकतात. त्याशिवाय आमच्याकडे वेगवेगळ्या क्षेत्रातील तज्ञ आहेत. येथे विद्यार्थ्यांना अॅमेझॉन वेब सर्व्हिसेसचे व गुगल क्रेडिटचे सर्वसामान्य इनक्युबेटर लाभ मिळतात.

एमबीएच्या दुस‍ऱ्या वर्षाला असलेला मोहनदीप अरोरा हा बीयूचा विद्यार्थी मुक्त पत्रकारांसाठी ‘न्यूजगेटर’ हे अॅप बनवण्याचे काम करीत आहे. मानधन वेळेवर मिळवणे हे मुक्त पत्रकारांसाठी मोठे आव्हान असते, असे सांगत मोहनदीप म्हणाला की, न्यूजगेटरमुळे मुक्त पत्रकारांना त्यांचे किती मानधन मिळाले आणि किती येणे बाकी आहे हे समजेल. शिवाय वृत्तपत्र चालवणा‍ऱ्यांना या अॅपवर लेखकांची किंवा पत्रकारांची माहिती समजू शकेल. लेखक या अॅपमधील मजकूर व्यवस्थापन सिस्टीमद्वारे त्यांचे लिखाण थेट पाठवू शकतात, असेही मोहनदीप म्हणाला.