CBSE: बारावीच्या 'या' विद्यार्थिनीला सर्व सहा विषयांत १०० गुण!

सीबीएसई बोर्डाचा निकाल जाहीर झाला आणि निकालाची लिंक मात्र कोलमडली. हजारो मुलांप्रमाणेच दिव्यांशी जैन हीदेखील निकाल पाहण्यास उत्सुक होती. तिचे खूप प्रयत्न सुरू होते, पण क्रॅश झालेल्या वेबसाइटमुळे तिला काही निकाल कळत नव्हता. तितक्यात तिला एक फोन कॉल आला. तो फोन तिच्या शाळेतून आला होता. समोरून तिनं जे काही ऐकलं त्यानंतर ती आनंदाने जवळजवळ किंचाळली आणि आनंदाने अक्षरश: रडू लागली. ती आनंदाची बातमी ही होती की तिला बारावीत चक्क १०० टक्के मिळाले होते. प्रत्येक विषयात पैकीच्या पैकी गुण. ६०० पैकी ६०० गुण.

दिव्यांशीने लखनऊच्या नवयुग रेडिअन्स सेकंडरी शाळेतून कला शाखेतून बारावीची परीक्षा दिली होती. 'मला ऐकून धक्का बसला. निकाल अविश्वसनीय होता. मला मी टॉपर्समध्ये असेन याची खात्री होती, पण असं खणखणीत यश मिळेल असं वाटलं नव्हतं,' ती म्हणाली.

दिव्यांशीने भूगोल वगळता सर्व सहा विषयांची परीक्षा दिली होती. भूगोल विषयाची परीक्षा कोविड - १९ मुळे रद्द झाली होती. दिव्यांशीला आधी शाळेतून आलेला कॉल खोटा वाटला. ती विश्वासच ठेवायला तयार नव्हती. 'आम्हाला या निकालावर विश्वास ठेवायला थोडा वेळ लागला,' असं तिची मोठी बहिण श्रेयांशी म्हणाली.

कोविड -१९ मध्ये परीक्षा शक्यच नाही; शिक्षणमंत्री ठाम

'कधीच मार्कांच्या मागे धावू नका. त्याऐवजी तुम्ही आपल्या आवडीचं तेच करा. यश तुमच्यामागे येईल,' असा सल्ला दिव्यांशी देते. तिचे वडील राजेश प्रकाश जैन उद्योजक आहेत तर आई सीमा जैन गृहिणी आहे. दिव्यांशीला आर्किओलॉजीत करिअर करायचं आहे. तिने दिल्ली विद्यापीठात इतिहास विषय घेऊन पदवीसाठी अर्ज केला आहे.

सीबीएसई बोर्डाचा बारावीचा निकाल जाहीर

दिव्यांशीच्या यशाने आम्हाला खूप आनंद झाला आहे. ती अव्वल येईल असं आम्हाला वाटलं होतं पण १०० टक्के म्हणजे खूपच छान, अशी प्रतिक्रिया तिच्या मुख्याध्यापिका बी. सिंग यांनी दिली.