CBSE: मार्क वाढवायच्या नावे फसवणूक; बोर्डाने केले सावध

CBSE board exam 2020 latest update: केंद्रीय माध्यमिक शिक्षण मंडळ अर्थात सीबीएसईने दहावी आणि बारावीसंदर्भात बोर्डाची परीक्षा देणाऱ्या विद्यार्थ्यांना सावध केले आहे. बोर्डाने या विद्यार्थ्यांसाठी आणि त्यांच्या पालकांसाठी महत्त्वाची सूचना जारी केली आहे.

सीबीएसईच्या विद्यार्थी आणि पालकांना बोर्डाने परीक्षेतील गुण वाढवण्यासाठी पैसे मागण्याच्या प्रकारांबाबत सावध केले आहे. सूचनेत म्हटलंय की 'काही लोक सीबीएसईचे अधिकारी असल्याचे सांगत लोकांशी संपर्क साधत असल्याची माहिती मिळाली आहे. हे लोक दावा करत आहेत की ते विद्यार्थ्यांचे गुण वाढवून देऊ शकतात. त्यासाठी अव्वाच्या सव्वा रक्कमही पालकांकडून मागितली जात आहे.'

बोर्डाने पुढे म्हटलंय की हे लोक बनावट आहेत. बोर्ड अशा प्रकारच्या गैरप्रकारांना कधीही थारा देत नाही. अशा कोणत्याही लोकांच्या फसवणुकीला बळी पडू नका, असं आवाहन बोर्डाने केलं आहे. असा कुठला प्रकार तुमच्याबाबतीत घडला, कानावर आला तर स्थानिक पोलिसांना त्याची माहिती द्या, जेणेकरून पोलीस अशा लोकांविरोधात कारवाई करतील. अशा प्रकारच्या कोणत्याही फसवणुकीसाठी बोर्ड जबाबदार नसेल. तुम्ही असं कोणत्या आमिषाला बळी पडत असाल तर त्यात चूक तुमचीही असेल.

CBSE: काय आहे सायबर सेफ्टी हँडबुक?

डीडीवर १२ तासांचा एअर टाइम द्या: शिक्षणमंत्री वर्षा गायकवाड

दहावी आणि बारावीच्या उर्वरित विषयांच्या परीक्षा १ जुलैपासून सुरू होत आहेत. सध्या ज्या विषयांची परीक्षा झाली आहे, त्या उत्तरपत्रिकांच्या मूल्यांकनाचं काम सुरू आहे.

सीबीएसईची ही सूचना वाचण्यासाठी येथे क्लिक करा.