करोना: इंग्रजी शाळांनी परीक्षा लवकर घ्याव्यात

कोल्हापूर:
करोना व्हायरसने बाधित असलेले रुग्ण आपल्या राज्यातही आढळून आल्याने राज्यातील इंग्रजी शाळांनी खबरदारी म्हणून शक्य तेवढं लवकर परीक्षा घ्याव्यात असे आवाहन इंडिपेंडेंट इंग्लिश स्कूल्स असोसिएशन अर्थात ईसा (IESA) संघटनेतर्फे करण्यात आले आहे. शैक्षणिक वर्ष पूर्ण होत असल्याने जवळपा स सर्वच शाळांचा अभ्यासक्रम पूर्ण झालेला आहे तरी ज्या शाळांचा अभ्यासक्रम बाकी असेल अशा शाळांनी तातडीने अभ्यासक्रम पूर्ण करावा असे आवाहन संघटनेतर्फे करण्यात आले आहे. ज्या शाळांमध्ये परीक्षा पूर्ण झालेली आहे अशा शाळांनी तात्काळ विद्यार्थ्यांना सुट्ट्या द्याव्यात. सर्व शाळांनी सकाळची सामूहिक प्रार्थना रद्द करून वर्गामध्ये प्रार्थना घेण्यात यावी.

करोना व्हायरसचा प्रसार होऊ नये म्हणून इंग्रजी शाळांनी खालील उपाय योजना कराव्यात :-

- सर्व विद्यार्थ्यांना करोनाचा संसर्ग रोखण्यासाठी आवश्यक असलेल्या उपायोजना समजून सांगाव्यात व तशा लेखी सूचनाही द्याव्यात.

- सर्व क्रीडा तास व क्रीडा स्पर्धा रद्द करण्यात याव्यात.

- विद्यार्थ्यांना शाळेमध्ये जेवणाआधी हात धुण्यासाठी हँडवॉश व सॅनिटायझर उपलब्ध करून द्यावे.

- परीक्षा घेताना विद्यार्थ्यांमध्ये शक्यतो एक मीटरचं अंतर ठेवावे.

सर्दी खोकला असलेल्या विद्यार्थ्यांना घरी थांबण्याच्या सूचना द्याव्यात व अशा विद्यार्थ्यांचा आजार बरा झाल्यानंतर शक्य असल्यास फेरपरीक्षा घ्यावी जेणेकरून विद्यार्थ्यांचे शैक्षणिक नुकसान होणार नाही याची काळजी घ्यावी. आजारी विद्यार्थ्यांचे शाळेमध्ये समुपदेशन करण्यात यावे व सर्व शिक्षकांना विद्यार्थ्यांच्या तब्येतीवर लक्ष ठेवण्याचे सूचना देण्यात यावे असे आवाहन ईसा संघटनेतर्फे प्रदेशाध्यक्ष राजेंद्र दायमा, राष्ट्रीय संघटक ललित गांधी यांनी सर्व शाळांना केले आहे.

करोना: यूपीतली शाळा-कॉलेजे २२ मार्चपर्यंत बंद

दहावी गणिताचा पेपर अवघड; विद्यार्थिनीची आत्महत्या

मार्क्स आणि मास्कची ‘परीक्षा’