MUHS: वैद्यकीय परीक्षाही पुढे ढकलल्या

म. टा. विशेष प्रतिनिधी, मुंबई

महाराष्ट्र आरोग्य विज्ञान विद्यापीठाच्या वतीने (MUHS) पदवी व पदव्युत्तर स्तरावर घेण्यात येणाऱ्या उन्हाळी सत्र-२०२० या परीक्षा अनिश्चित कालावधीसाठी पुढे ढकलल्या आहेत. या परीक्षांच्या नियोजनासाठी नियुक्त करण्यात आलेल्या समितीने नुकत्याच झालेल्या बैठकीत हा निर्णय घेतला आहे.

आरोग्य विज्ञान विद्यापीठांतर्गत चालविण्यात येणाऱ्या अभ्यासक्रमांच्या परीक्षेसंदर्भात नेमण्यात आलेल्या समितीची बैठक पार पडली. या बैठकीसाठी प्र कुलगुरू डॉ. मोहन खामगावकर हे अध्यक्षस्थानी होते. समितीने शिफारस केल्यानुसार प्रशासनाने परीक्षांसंदर्भात निर्णय घेताना उन्हाळी सत्र २०२०च्या परीक्षा पुढील सूचना येईपर्यंत पुढे ढकलत असल्याचे म्हटले आहे. या परीक्षांचे वेळापत्रक राज्य सरकार, संस्थाप्रमुख, अध्यापक, पालक व विद्यार्थ्यांशी संवाद साधून ठरविले जाणार आहे. विद्यापीठाच्या पुढे ढकलण्यात आलेल्या परीक्षांचे अंतिम वेळापत्रक निश्चित करताना केंद्रीय परिषदांशी समन्वय साधून विद्यार्थ्यांना परीक्षेच्या तयारीसाठी पुरेसा कालावधी देण्याचेही आश्वासन या निर्णयात देण्यात आले आहे.

दरम्यान, महाराष्ट्र आरोग्य विज्ञान विद्यापीठाशी संबंधित कुठल्याही अफवांवर विश्वास ठेवू नये. विद्यापीठाच्या कुठल्याही निर्णयाची खात्री करण्यासाठी विद्यापीठाच्या संकेतस्थळास भेट द्यावी, असे आवाहन विद्यापीठाचे परीक्षा नियंत्रक डॉ. अजित पाठक यांनी केले आहे.

विद्यापीठ, महाविद्यालयांच्या केवळ अंतिम वर्षांच्या परीक्षा होणार

सीबीएसई दहावी, बारावीच्या उर्वरित परीक्षा 'या' दिवशी

एफवाय, एसवाय विद्यार्थ्यांचे मूल्याकंन कसे?...वाचा