वाढत्या करोना संक्रमणामुळे 'या' जिल्ह्यात सर्व शाळांना सुट्टी

नवी दिल्ली: देशभरात अनेक ठिकाणी कोविड -१९ संक्रमणाने (increase in covid cases) हळूहळू पुन्हा डोके वर काढायला सुरूवात केली आहे. लडाख प्रशासनाने शुक्रवारी लेह जिल्ह्यातील सर्व शासकीय आणि खासगी शाळांना १५ दिवसांची सुट्टी जाहीर केली. या केंद्र शासित प्रदेशात कोविड संक्रमण वाढल्याने सरकारने हा निर्णय घेतला आहे.

लडाख केंद्र शासित प्रदेशात कोविड-१९ संक्रमित रुग्णांमध्ये अचानक वाढ झाल्याने लडाख प्रशासनाने शुक्रवारी लेह जिल्ह्यातील सर्व सरकारी आणि खासगी शाळांना देखील १५ दिवसांची उन्हाळी सुट्टी देण्याचा आदेश जारी केला. मागील सहा दिवसांमध्ये लडाखमध्ये ६६ नागरिक करोना व्हायरस संक्रमित झाले आहेत.

लेहचे जिल्हा दंडाधिकारी श्रीकांत बाळासाहेब सुसे यांनी आदेशात म्हटले आहे की, 'कोविड प्रकरणांमध्ये झालेल्या वाढीच्या पार्श्वभूमीवर विशेषकरून मुलांमधील संक्रमण साखळी तोडण्यासाठी उपाययोजना म्हणून लेह जिल्ह्यातील सर्व सरकारी आणि खासगी शाळांना उन्हाळी सुट्ट्या देणे योग्य होईल.'

BMC Job: मुंबई पालिकेच्या आरोग्य विभागात विविध पदांची भरती, 'येथे' करा अर्ज

लेह मध्ये आता उन्हाळी सुट्ट्या आता ४ जुलै पासून सुरू होतील. या व्यतिरिक्त, लडाख कला, संस्कृती आणि भाषा अकादमी (LACAL) द्वारा देखील एक आदेश जारी करण्यात आला आहे. यानुसार, लडाख बाल महोत्सव स्थगित करण्यात आला आहे. हा महोत्सव ४ जुलै रोजी होणार होता. नव्या तारखांची घोषणा लवकरच करण्यात येणार आहे.