IDOL च्या तीन विद्यार्थ्यांनी दिली परदेशातून परीक्षा

IDOL Final Year Exams 2020: करोनाच्या साथीमुळे यंदा मुंबई विद्यापीठाने (Mumbai University)अंतिम वर्षाची परीक्षा ऑनलाइन पद्धतीने घेतली. दूर व मुक्त अध्ययन संस्थेच्या (IDOL) तीन विद्यार्थ्यांनी परदेशातून परीक्षा दिली आहे. अमेरिका, फ्रान्स व जर्मनीतून या विद्यार्थ्यांनी तृतीय वर्ष बीएची परीक्षा यशस्वीरीत्या दिली आहे. तसेच भविष्यातही परीक्षा ऑनलाइन पद्धतीने आयोजित करण्याची सूचनाही विद्यार्थ्यांनी केली आहे.

'आयडॉल'ची वर्ष २०२०च्या तृतीय वर्ष बीए व बीकॉमची परीक्षा २६ ऑक्‍टोबरपासून सुरू झाली. यातील तृतीय वर्ष बीएची परीक्षा (Third Year BA) बुधवारी संपली. 'आयडॉल'च्या विद्यार्थ्यांना घरी राहून परीक्षा देण्याची सुविधा यंदा उपलब्ध करून देण्यात आली. 'आयडॉल'मधून शिक्षण घेणारे विद्यार्थी नोकरीच्या ठिकाणी आहेत, तर काही विद्यार्थी करोनाविषयक निर्बंधांमुळे परदेशात अडकले आहेत. त्यांनी परदेशात राहून अंतिम वर्षाची परीक्षा ऑनलाइन पद्धतीने दिली आहे.

अपर्णा काकिर्डे या विद्यार्थिनीने अर्थशास्त्र विषयाची बीए अंतिम वर्षाची परीक्षा अमेरिकेतून ऑनलाइन दिली आहे. 'मी परीक्षेसाठी भारतात प्रवास न करता अमेरिकेत राहून ही परीक्षा दिली. परीक्षा देताना कोणताही अडथळा आला नाही,' अशी प्रतिक्रिया या विद्यार्थिनीने विद्यापीठाला कळवली. अमृता सुभाष नंदी या विद्यार्थिनीने फ्रान्समधून इंग्रजी विषयात बीएची अंतिम वर्षाची परीक्षा ऑनलाइन दिली. तर सुरेंद्र सोळंखी हा विद्यार्थी जर्मनीमध्ये नोकरी करत आहे. त्याने अर्थशास्त्र विषयाची बीएची अंतिम वर्षाची परीक्षा जर्मनीतून ऑनलाइन दिली.

CTET Exam: पुढील वर्षी होणार सीटीईटी परीक्षा; नवी तारीख आली