यूजीसी नेट परीक्षेचे अॅडमिट कार्ड जारी

UGC NET Admit Card 2020: नॅशनल टेस्टिंग एजन्सीने (NTA) यूजीसी नेट परीक्षेचे अॅडमिट कार्ड शनिवार १९ सप्टेंबर २०२० पासून उपलब्ध केले आहेत. एनटीए यूजीसी नेटच्या अधिकृत संकेतस्थळावर हे अॅडमिट कार्ड उपलब्ध होणार आहेत. संकेतस्थळाचा पत्ता ugcnet.nta.nic.in असा आहे.

उमेदवारांना यूजीसी नेट अॅडमिट कार्ड डाऊनलोड करण्यासाठी अधिकृत संकेतस्थळावर लॉगइन करावे लागेल. ज्या उमेदवारांना अॅडमिट कार्ड डाऊनलोड करता येणार नाही ते सकाळी १० ते सायंकाळी ५ या वेळेत एनटीएच्या हेल्पलाइन क्रमांकावर संपर्क साधू शकतील.

दरम्यान, सोमवारी १४ सप्टेंबर रोजी एनटीए ने यूजीसी नेट परीक्षा लांबणीवर टाकली. इंडियन काउन्सिल ऑफ अॅग्रीकल्चरल रिसर्च (ICAR) परीक्षा आणि यूजीसी नीट परीक्षा एकाच वेळी येत असल्याने एकमेकांशी क्लॅश होत होत्या. त्यामुळे यूजीसी नेट लांबणीवर टाकण्यात आली.

UPSC CMS 2020 परीक्षेची तारीख जाहीर

यूजीसी नेट परीक्षा १६ सप्टेंबर पासून सुरू होणार होती. ही परीक्षा १६ सप्टेंबर ते २५ सप्टेंबर या कालावधीत आयोजित करण्यात आली होती. पण आता ती २४ सप्टेंबर नंतरच होणार आहे. उमेदवारांना एनटीएने त्यांच्या अॅडमिट कार्ड वर दिलेल्या तारखेला आणि सत्राला परीक्षा केंद्रावर पोहोचायचे आहे. परीक्षा केंद्र, तारीख, वेळ, विषय यात कोणताही बदल केला जाणार नाही.

विद्यापीठ अनुदान आयोगाची राष्ट्रीय पात्रता परीक्षा म्हणजेच यूजीसी नेट ही राष्ट्रीय पातळीवरीज परीक्षा आहे. सहाय्यक प्राध्यापक किंवा ज्युनिअर रिसर्च फेलोशीप करण्यासाठी ही पात्रता परीक्षा द्यावी लागते. यापूर्वी म्हणजे २०१८ पर्यंत केंद्रीय माध्यमिक शिक्षण मंडळ अर्थात सीबीएसई बोर्ड नेट परीक्षा घेत असे.