इलेक्ट्रॉनिक्स इंजिनीअरिंग करायचंय!

• मला इंजिनीअरिंग क्षेत्रातील करिअरविषयी प्रश्न विचारायचे आहेत. मला एमएचटी सीईटी प्रवेश परीक्षेत १६८ (पीसीएम स्कोअर) गुण मिळाले आहेत. कॅम्पस सिलेक्शनच्या दृष्टिकोनातून इलेक्ट्रॉनिक्स इंजिनीअरिंगला भविष्यात चांगल्या संधी आहेत का?

- विराज गावडे

इलेक्ट्रॉनिक्स इंजिनीअरला मॅन्यूफॅक्चर (उत्पादन), ग्राहकोपयोगी इलेक्ट्रॉनिक्स वस्तूंची विक्री आणि सेवा (सेल्स अँड सव्र्हिस) आदी संबंधित काम करावं लागतं. कामाच्या या संधी इलेक्ट्रॉनिक्स इंजिनीअरला खासगी तसंच सार्वजनिक क्षेत्रात मिळू शकतात. या इंजिनीअर्सना मायक्रोप्रोसेसर्स, फायबर ऑप्टिक्स आणि टेलिकम्युनिकेशन सिस्टीम्स जसं की टीव्ही, रेडिओ आणि टेलिफोन यांच्याशी संबंधित काम करावं लागतं. एटंरटेमेंट ट्रान्समिशन (मनोरंजन प्रसारण) इंडस्ट्री, रिसर्च एस्टॅब्लिशमेंट्स (संशोधन आस्थापन) आणि संरक्षण क्षेत्रात इलेक्ट्रॉनिक्स इंजिनीअर्सना चांगली मागणी आहे. कॅम्पस सिलेक्शनचा तुम्ही विचार करत आहात, तर एक लक्षात घ्या की, अर्थव्यवस्थेत होणाऱ्या बदलांनुसार कॅम्पस रिक्रूटमेंटमध्ये बदल होत असतात. पण तुम्ही आपलं ज्ञान, प्रशिक्षण अप टू डेट ठेवण्याचा प्रयत्न करा. शैक्षणिक पार्श्वभूमी चांगली ठेवतानाच या क्षेत्रात करिअर करण्यासाठी आवश्यक असणारी कौशल्यंही आत्मसात करा.• मी कॉमर्स शाखेतून ७५ टक्के गुणांसह बारावी पास झाले आहे. मला यूपीएससी परीक्षेची तयारी करायची आहे. त्यासंदर्भात माझे काही प्रश्न आहेत -• यासाठी बीए, बीकॉम किंवा बीएससी सोडून इतर असा कोणता कोर्स मला उपयोगी ठरेल, ज्यामुळे मला नोकरीची सुरक्षितता (जॉब सिक्युरिटी) लाभेल?• बॅचलर इन मास मीडिया हा कोर्स यासाठी उपयोगी ठरेल का?• बीएमएम (मराठी) कोर्स केल्यावर कितपत वाव आहे?• बीएससीचा अभ्यास करता करता यूपीएससी परीक्षेच्या तयारी बाजूला पडू शकते का?• कृपया मला योग्य ते मार्गदर्शन करा. बीएमएम नोकरी मिळवण्यासाठी आणि यूपीएससी परीक्षा देण्यासाठी उपयोगी ठरेल का?

-स्मिता आरदे

केवळ बॅचलर डिग्री कोर्स पूर्ण करून सुरक्षित चांगली नोकरी मिळणं अशक्य आहे. चांगली नोकरी मिळवण्यासाठी तुमच्याकडे उत्तम शैक्षणिक पार्श्वभूमीबरोबरच त्या नोकरीसाठी आवश्यक ती कौशल्यंही जोडीला असायला हवीत. कोणत्याही क्षेत्रातील ग्रॅज्युएट्सना यूपीएससी परीक्षा देता येते. तुम्ही बीएमएम (मराठी) कोर्स केल्यावर तुम्हाला मराठी नियतकालिकांमध्ये आणि मराठी मीडिया हाउसेस (दैनिक, मासिक, साप्ताहिक आदी तसंच न्यूज चॅनल्स) मध्ये नोकरीच्या संधी मिळू शकतात. यूपीएससी परीक्षेच्या तयारीसाठी तुम्हाला किमान दोन ते तीन वर्षं द्यायला हवीत. या वर्षांत व्यवस्थित अभ्यास करून परीक्षेची तयारी तुम्हाला करता येईल. फारच थोड्या जणांना नोकरी करता करता या परीक्षेचा अभ्यास करणं आणि परीक्षेत यश मिळवणं शक्य होतं. म्हणून आधी आपलं ध्येय, आपल्या गरजा आदी सगळ्या गोष्टींचा नीट विचार करा आणि मग काय तो निर्णय घ्या.