ऐपत नसेल तर सांगा, शिवजयंतीवरुन विनोद पाटील महानगरपालिकेवर संतापले

औरंगाबाद : शिवजयंतीच्या उत्सवासाठी सजावटीचं कंत्राट दिलेल्या कंत्राटदाराचं गेल्या दोन वर्षांपासून औरंगाबाद महानगरपालिकेने बिल थकवल्याने मराठा आरक्षण याचिकाकर्ते विनोद पाटील चांगले संतापले आहेत. तर शिवजयंती उत्सव साजरा करण्याची आपली ऐपत नसेल तर आम्हाला तसं सांगावं. शिवभक्त, शिवप्रेमी म्हणून आमच्या राजाच्या जन्मोत्सवाच्या कार्यक्रमाचा संपूर्ण खर्च करण्याची माझी तयारी असल्याचं म्हणत पाटील यांनी आपला संताप व्यक्त केला आहे.

दरवर्षी औरंगाबाद शहरात शिवजयंती मोठ्या उत्साहात साजरी होते. विशेष म्हणजे क्रांती चौकातील छत्रपती शिवाजी महाराजांच्या पुतळ्याच्या परिसरात सजावट, साउंड सिस्टीम, इत्यादी कार्यक्रमांचा औरंगाबाद महानगरपालिका आयोजन करत असते. त्याचप्रमाणे 19 फेब्रुवारी 2020 रोजीच्या कार्यक्रमाचं कंत्राट महानगरपालिकेने संतोष चादरे यांना दिलं होतं. मात्र दोन वर्षे उलटूनही त्यांच्या बिलाचे पैसे अजूनही मिळाले नाही. त्यामुळे यावरून विनोद पाटील यांनी महानगरपालिकेवर संताप व्यक्त केला.

तर यावर पुढे बोलताना पाटील म्हणाले की, अशा प्रकारची घटना शिवछत्रपतींच्या जयंतीबाबत होत असेल तर याचा खेद वाटतो. त्यामुळे आता एकच विनंती की, मागचे बिल द्यावेत तसेच उद्याची जयंती सुद्धा थाटामाटात साजरी करावी. ऐपत नसेल तर तस स्पष्ट सांगावे मी शिवभक्त म्हणून महापालिकेचे शिवजयंतीचे मागचे बिल देण्यास तयार आहे. तसेच २०२२ शिवजन्मोत्सव स्वखर्चाने करण्यास तयार आहे, असंही विनोद पाटील म्हणाले.