पराहुल हडकर 'सिटिझन रिपोर्टर ऑफ द मंथ'!

सर्वसामान्यांना भेडसावणाऱ्या समस्यांना वाचा फोडण्यासाठी 'महाराष्ट्र टाईम्स'ने तंत्रज्ञानाच्या मदतीने सिटिझन रिपोर्टर अॅपची निर्मिती केली. अल्पावधीतच या 'अॅप'वर वाचकांकडून येणाऱ्या तक्रारींचा, समस्यांसह विधायक कार्यांच्या नोंदीचा अक्षरशः पाऊस पडला. सार्वजनिक हिताच्या दृष्टीने ही समस्या या अॅपच्या माध्यमातून 'मटा'पर्यंत पोहचवणाऱ्या एका रिपोर्टरला 'सिटिझन रिपोर्टर ऑफ दि मंथ' या पुरस्काराने महिन्यातून एकदा सन्मानित करण्यात येणार आहे. या पुरस्काराचे पहिले मानकरी ठरले भांडुपचे रहिवासी राहुल हडकर. शुक्रवारी महाराष्ट्र टाइम्सचे संपादक अशोक पानवलकर आणि निवासी संपादक श्रीकांत बोजेवार यांच्या हस्ते 'मटा'च्या कार्यालयात त्यांना स्मार्ट फोन व प्रशस्तीपत्रक देऊन गौरवण्यात आले. वांद्रे येथे म्हाडा येथे अग्निप्रतिरोधक यंत्राच्या वापरण्याच्या सुविधेची चावी येथील एका पेटीमध्ये ठेवण्याची व्यवस्था आहे. मात्र ती चावीच नसल्याने ही यंत्रणा कुचकामी ठरत होती, हडकर यांनी तत्परतेने ही समस्या सिटिझन रिपोर्टर अॅप वर पाठवली, अॅपवर ही बातमी प्रसिद्ध होताच चावी पूर्ववत ठेवण्यात आली. या अॅपमुळे चेहरा नसलेल्या सर्वसामान्य व्यक्तींच्या समस्याही अल्पावधीत सोडवल्या जातात, ही सर्वात मोठी दिलासादायक बाब असल्याचे समाधान हडकर यांनी व्यक्त केले.